भारतबाट स्याङ्जाली आउनेक्रम जारी, कसरी हुदैछ त व्यवस्थापन !

आँधीखोला खबर/स्याङ्जा :
रोजगारीका लागि भारत गएका स्याङ्जालीहरुको आउने क्रम तिव्र भएको छ । शनिवार मात्रै एक सय भन्दा धेरै भारतबाट जिल्ला भित्रिएको प्रशासनले जनाएको छ । भारतका बिभिन्न ठाउँबाट कष्टपूर्ण यात्रा गर्दै नेपालसँगको सिमानामा आई पुगेका उनीहरु जिल्लाका स्थानीयतहको समन्वयमा ल्याउने काम भईरहेको बताईएको छ । कतिपय नागरिक बुटवल सम्म तथा कतिपय राम्दी सम्म नै कष्टपूर्ण यात्रा गर्दै आएको पाईएको छ । राम्दीबाट भने जिल्लाका स्थानीयतहले ल्याउने गरेकाछन् ।
केही दिन पहिले रुपन्देहीका बिभिन्न क्वारेन्टीनमा रहेका जिल्लाबासीलाई वालिङ नगरपालिकाको समन्वयमा गाडी नै पठाएर ल्याइएको थियो । जिल्लाका नागरिकले दुख पाएको सुचना पाएपछि गाडीको व्यवस्था गरी पठाईएको वालिङ नगरपालिकाले जनाएको छ ।
केही दिन सम्म नै जिल्लामा भारतमा रहेका जिल्लाका नागरिक आउने क्रम रहने भन्दै उनीह्रुको व्यवस्थापनको तयारी भईरहेको स्याङ्जाका प्रमुख जिल्ला अधिकारी रामबहादुर कुरुम्बाङले जानकारी दिनुभयो । उहाँले स्थानीयतहको समन्वयमा व्यवस्थापनको काम भईरहेको र उनीहरुलाई जिल्लामा आउना साथ नै तत्कालै क्वारेन्टीनमा राखिने गरेको बताउनु भयो । कोरोना पिसिआर परिक्षण पश्चात मात्रै घरमा सुरक्षित रहने गरी पठाईने गरेको प्रजिअ कुरुम्बाङले जानकारी दिनुभयो ।
लामो एबं कष्टपूर्ण यात्रा पछि देशको सिमानामा आएका नेपालीहरु स्वदेश प्रवेशको पर्खाईमा रहेको बताईएको छ । जहाँ स्याङ्जा सहितका जिल्लाका नागरिक रहेको बताईएको छ ।
शनिवार मात्रै नेपाल प्रवेशको पर्खाईमा रहेका स्याङ्जाको हरिनासका एक युवाको सिमावर्ती नौतनवामा रहेको क्वारेन्टीनमा नै ज्यान गएको छ ।
जिल्लामा आएका नागरिकलाई आआफनै पालिका तथा वडामा लगेर क्वारेन्टीनमा राख्ने गरिएको छ । उनीहरुको पिसिआर परिक्षण पछि मात्रै सुरक्षित रुपमा घरमा बस्ने गरी पठाईने गरिएको प्रजिअ कुरुम्बाङले जानकारी दिनुभयो ।