स्याङ्जाका ९७ वडामा कांग्रेसको अधिवेशन सम्पन्न

स्याङ्जा

नेपाली कांग्रेसको १५औँ महाधिवेशनअन्तर्गत स्याङ्जाका ९७ वटै वडामा अधिवेशन सम्पन्न भएको छ । अधिवेशनबाट वडा समितिको नेतृत्व चयन गरिएको छ ।

जिल्लाका ११ स्थानीय तहअन्तर्गत ९७ वडामध्ये ९६ वडामा निर्विरोध वडा समिति चयन भएको र एक वडामा निर्वाचन भएको नेपाली कांग्रेस स्याङ्जाका जिल्ला उपसभापति केदार काफ्लेले बताउनुभयो ।

वालिङ नगरपालिका–१३ मा निर्वाचनमार्फत वडा समिति चयन गरिएको हो । वडा सभापतिमा ईश्वरी गैरे निर्वाचित हुनुभएको छ । गैरेले १०० मत प्राप्त गर्दा उहाँका प्रतिस्पर्धी राजकुमार गैरेले ४० मत प्राप्त गर्नुभएको थियो । जिल्लाका सबै वडामा क्षेत्रीय प्रतिनिधिसमेत सहमतिका आधारमा चयन भएको काफ्लेले बताउनुभयो ।

जिल्लाका ९७ वडामध्ये पुतलीबजार नगरपालिका–४ मा मात्र महिला वडा सभापति चयन हुनुभएको छ । उक्त वडामा लीलावती पौडेल निर्विरोध वडा सभापति चयन हुनुभएको हो ।

Facebook Comments Box