स्याङ्जाको गल्याङमा जिप दुर्घटना: २ जनाको मृत्यु, १० घाइते

स्याङ्जा :

स्याङ्जाको गल्याङ नगरपालिका–८ करादीस्थित भित्री सडक खण्डमा सोमबार साँझ जिप दुर्घटना हुँदा दुई जनाको घटनास्थलमै मृत्यु भएको छ। दुर्घटनामा चालकसहित १० जना घाइते भएका छन्।

गल्याङबाट गल्याङ नगरपालिका वडा नम्बर ९ साङलियातर्फ जाँदै गरेको ग १ ज ६५३४ नम्बरको बोलेरो जिप उकालो घुम्तीमा अनियन्त्रित भई दुर्घटनामा परेको प्रहरीले जनाएको छ।

प्रहरी घटनास्थल पुग्नुअघि नै स्थानीयले केही घाइतेहरूलाई उपचारका लागि अस्पताल पठाएकाले जिपमा जम्मा कति जना सवार थिए भन्ने यकिन हुन बाँकी छ। दुर्घटनाका घाइतेहरूलाई उद्धार गरी उपचारका लागि नजिकैका अस्पतालहरूमा पठाइएको छ।

दुर्घटनाको खबर लगत्तै इलाका प्रहरी कार्यालय गल्याङ र ट्राफिक प्रहरीको ७ जनाको टोली उद्धारमा खटिएको थियो। दुर्घटनाको थप अनुसन्धान र उद्धारका लागि वडा प्रहरी कार्यालय वालिङबाट प्रहरी नायब उपरीक्षक (DSP) प्रताप पौडेलको कमाण्डमा १५ जनाको प्रहरी टोली घटनास्थल पुगेको छ।

मृतक तथा घाइतेहरूको पहिचान खुलाउने र अस्पताल पुगेर घाइतेहरूको विस्तृत विवरण सङ्कलन गर्ने कार्य भइरहेको प्रहरीले जनाएको छ। घटनाको थप विवरण आउन बाँकी छ।

Facebook Comments Box