जगत्रदेवी साहित्य सम्मान डुम्रेलाई

स्याङ्जा :

जगत्रदेवी साहित्य सङ्गम गल्याङ, स्याङ्जाले गल्याङ नगरपालिका–३ मा काव्यकृति विमोचन, स्रष्टा सम्मान तथा काव्य गोष्ठी समारोह–२०८० गरेको छ । समारोहमा साहित्यकार सूर्यप्रसाद डुम्रेलाई सम्मान प्रदान गरिएको छ ।

कार्यक्रममा अग्रज कवि चण्डिकाप्रसाद भट्टराईको पहिलो एकल कृतिको रूपमा प्रकाशित भएको कविता कृति आँखीझ्यालको विमोचन गरिएको छ । विमोचन गरिएको कृतिबारेमा समीक्षक जीवनपानी र डा. विप्लव ढकालले समीक्षात्मक टिप्पणी प्रस्तुत गर्नुभयो ।

यस्तै, जगत्रदेवी साहित्य सङ्गमले स्थापना गरेको जगत्रदेवी साहित्य सम्मान–२०८० जगत्रदेवी साहित्य सङ्गमका संस्थापक अध्यक्ष अग्रज साहित्यकार डुम्रेलाई समर्पण गरिएको हो ।

कार्यक्रममा वरिष्ठ साहित्यकार डा. विप्लव ढकाल, वरिष्ठ गजलकार जीवनपानी, गल्याङ नगरपालिका उपप्रमुख हेमा न्यौपाने, डा. पद्मा अर्याल, मिलन समीर, हरिप्रसाद भट्टराई, लेखनाथ काफ्ले, वसन्त खनाल, भीम न्यौपाने, खगेन्द्रजङ्ग थापा, वसन्ती अधिकारी, कला पाठक, सिर्जना खनाल, प्रवेश अर्याल, लीलाबल्लभ अर्याल, सूर्यप्रसाद डुम्रेले कविता, गजल र मुक्तक वाचन गर्नुभयो ।

कार्यक्रममा गल्याङ नगरपालिका प्रमुख गुरुप्रसाद भट्टराईले साहित्य एक कला भएको र सबैसँग फरक कला हुने बताउनुभयो ।

Facebook Comments Box