स्याङ्जा : उमेर नपुग्दै बिहे गर्नेको सङ्ख्या उच्च

स्याङ्जा :

सरकारले बिहे गर्ने समय नै तोकेर कानुनी हिसाबले बिहेबारी २० वर्षपारि भनेको छ । २० वर्षपश्चात् गरिएको बिहेबारीलाई महिलाको शारीरिक र मानसिक रूपमा बच्चा जन्माउन तयार हुने भनी लिइएको छ । स्याङ्जामा भने उमेर नपुग्दै बिहे गर्नेको सङ्ख्या उच्च रहेको प्रदेश जनस्वास्थ्य कार्यालय स्याङ्जाको तथ्याङ्कमा देखिएको हो । यहाँ आर्थिक वर्ष २०८१/८२ मा दुई हजार ५५९ जनाले गर्भ जाँच गराएकामा २१० जना अर्थात् ८.२० प्रतिशत २० वर्षमुनिका रहेका थिए ।

गर्भ जाँच गराएकामा सुरक्षित प्रसूति सेवा ८८२ जनाले लिएको र ९२४ जनाले सुरक्षित गर्भपतन गरेको प्रदेश जनस्वास्थ्य कार्यालयका जनस्वास्थ्य प्रशासक केशव चापागाईंले जानकारी दिनुभयो ।

सुरक्षित प्रसूति सेवा लिनेमध्ये २० वर्षभन्दा कम उमेरका १०९ अर्थात् १२.३५ प्रतिशत रहेका छन् भने ४३ जना (४.३५ प्रतिशत) २० वर्षमुनिकाले गर्भपतन गराएको चापागाईंले बताउनुभयो । यो तथ्याङ्कमा हेर्दा २० वर्ष नपुग्दै बिहे गर्नेको सङ्ख्या अत्यधिक रहेको देखिएको चापागाईंले बताउनुभयो ।

सुरक्षित प्रसूति सेवा लिनेमा दक्ष प्रसूतिकर्मीबाट ६९५ जना, दक्ष स्वास्थ्यकर्मीबाट १६८ जना, अन्य स्वास्थ्यकर्मीबाट १३ जना र छ जना घरमै प्रसूति सेवा लिने रहेका छन् । यस्तै गर्भपतन गराउनेमध्ये १२ हप्तामुनिको मेडिकलबाट ८४१ जना, सर्जिकलबाट ८१ जनाले गराएका छन् भने १२ हप्तामाथिको सर्जिकलबाट दुई जनाले गर्भपतन गराएका छन् ।

सुरक्षित प्रसूति सेवा र गर्भपतन जिल्ला अस्पताल, पालिकास्तरका छ वटा अस्पताल, दुई प्राथमिक स्वास्थ्य केन्द्र, स्वास्थ्य चौकी र आधारभूत स्वास्थ्य सेवा केन्द्र गरेर १२१ स्वास्थ्य संस्थाबाट सेवा दिइएको छ । gorkhapatra daily

Facebook Comments Box