दुर्घटनामा परी पूर्व मेयर गिरीको मृत्यु

स्याङ्जा, असार २ गते ।
चापाकोट नगरपालिकाका पूर्व मेयर शिवकुमार गिरीको सवारी दुर्घटनामा परी मृत्यु भएको छ ।
गए राती पुतली बजार नगरपालिका १० बर्जामा राङ खोलाबाट स्याङ्जा बजार लागि छुटेको बा १५ च १७०९ नम्बरको स्कारपियो अनियन्त्रित भई दुर्घटना हुँदा स्कारपियोमा सवार चापाकोट नगरपालिका पूर्व मेयर ६० वर्षीय शिवकुमार गिरीको निधन भएको हो ।
चापाकोट नगरपालिका ४ दार्सिङ बस्ने पूर्व मेयर गिरी सवारी दुर्घटनामा परी गम्भीर घाइते भई उपचारको लागि जिल्ला अस्पताल स्याङ्जा पठाएकोमा उपचारको क्रममा राति ११ः४० बजे निधन भएको जिल्ला प्रहरी कार्यालय स्याङ्जाका सूचना अधिकारी रवीन्द्र खनालले जानकारी दिनुभयो ।
नेपाली काँग्रेसका महाधिवेशन प्रतिनिधि समेत रहनु भएका गिरीको शव जिल्ला अस्पतालमा रहेको प्रहरीले जनाएको छ । स्कारपियो भित्तामा ठोक्किएर सडकमा पल्टिएको र पूर्णरुपमा क्षति भएको र सडकमा उत्तानो परेको अवस्थामा रहेको प्रहरीले बताएको छ ।
प्रहरीले सवारी चालक पुतली बजार नगरपालिका ९ कोल्मा बस्ने ३२ वर्षीय सुरज नेपालीलाई नियन्त्रणमा लिएको छ ।

Facebook Comments Box