अर्जुन चौपारीमा नमुना युवा गाउँ सभा कार्यक्रम

स्याङ्जा, जेठ १ गते ।

अर्जुन चौपारी गाउँपालिका –१ मा नमुना युवा गाउँ सभा प्रशिक्षण तथा अभ्यास कार्यक्रम सुरु भएको छ ।

चार दिनसम्म चल्ने प्रशिक्षण तथा अभ्यास कार्यक्रम अर्जुन चौपारी गाउँपालिकाले राष्ट्रिय युवा परिषद् नेपालको समन्वयमा गरिएको हो ।

युवाको नेतृत्व तथा व्यक्तित्व विकास, नमुना गाउँ सभाको अभ्यास, निर्वाचन प्रक्रिया र युवा भएर के गर्न सकिन्छ? भन्ने बारेमा सिकाउने सरकारको नीतिअनुसार कार्यक्रम गरिएको हो ।

हरेक वर्ष एक जिल्लामा एक पालिकामा प्रशिक्षण तथा अभ्यास कार्यक्रम गर्ने सरकारको कार्यतालिकाअनुसार अर्जुन चौपारी परेको हो ।

कार्यक्रममा गाउँपालिका उपाध्यक्ष सपना गुरुङले सरकारको अपेक्षाअनुसार प्रशिक्षकसँग सिकेर व्यवहारमा उतार्न आग्रह गर्नुभयो ।

युवा समाज परिवर्तनको बाहक भएकाले गाउँ र समाजको परिवर्तनमा हाम्रो ठूलो जिम्मेवारी रहेको उहाँको भनाइ थियो ।

कार्यक्रममा प्रमुख प्रशासकीय अधिकृत उज्ज्वल बहादुर बस्नेत, जिल्ला युवा परिषद्का संयोजक आविष्कार क्षेत्री, वडा नं १ का अध्यक्ष रणबहादुर थापा, शिक्षा शाखा निमित्त प्रमुख कमला चापागाईँ लगायतले मन्तव्य राख्नुभएको थियो ।

नमुना युवा गाउँ सभा प्रशिक्षण तथा अभ्यास कार्यक्रममा पालिका भित्र रहेका ६ वडाका ३० प्रशिक्षार्थीको सहभागिता छ ।

प्रशिक्षण तथा अभ्यास कार्यक्रममा आविष्कार पराजुली र रञ्जना नेपालले सहजीकरण गर्नुभएको छ ।

Facebook Comments Box