निर्वाचन आयोग ई–भोटिङको तयारीमा : आयुक्त पौडैल

प्रकाश डोटेल,
स्याङ्जा, २८ जेठ

निर्वाचन आयोगका आयुक्त इश्वरीप्रसाद पौडेलले निर्वाचन प्रणालीलाई प्रविधिमैत्री बनाउँदै आयोग ई–भोटिङको तयारीमा लागेको बताएका छन् । उनले आयोगलाई संस्थागत सुदृढीकरण गर्दै प्रविधिमा आधारित प्रणाली उपयोग गर्न लागिएको बताए ।

जिल्ला निर्वाचन कार्यालय स्याङ्जाको नवर्निमित भवनको शनिबार शिलन्यास गर्दे उनले आयोगले प्रविधिलाई आत्मसाथ गर्दै अगाडी बढेको दाबी गरे । उनले प्रविधिको समुचित उपयोगमा आयोग रणनीतिक योजना बनाउन लागिरहेको समेत जानकारी दिए ।

भवन शिलन्यासका अवसरमा उनले आयोगको तेस्रो पञ्चवर्षिय रणनीतिक योजना अन्र्तगत निर्वाचन कार्यालय निर्माणका अभियानलाई अगाडी बढाउँदै लैजाने योजना रहेको सुनाए । आयोगले २०७६ देखि ०८१ सम्मको अवधिलाई पञ्चवर्षिय योजना बनाएर काम गर्दे आएको जानकारी दिए ।

देशभरका ७७ जिल्लामध्ये १९ जिल्लामा मात्रै निर्वाचनको कार्यालय रहेको उनले बताए । एक जिल्लामा निर्माणाधीन अवस्थामा र अन्य ९ वटा कार्यालय सरकारी भवनमा रहेर काम गर्दे आएको आयुक्त पौडेलले जानकारी दिए । उनका अनुसार अब १० वटा कार्यालय बन्ने तयारीमा रहेको छ ।

शिलन्यास गरिएको भवन एक वर्षभित्र निर्माण सम्पन्न गर्ने गरी बि.एम. वील्डर्स एण्ड सियोन एडभेन्चर कन्स्ट्रक्सनले निर्माणको जिम्मा लिएको छ । २ करोड ३ लाखको लागतमा जिल्ला सदरमुकाम पुतलीबजार नगरपालिका १ मा भवन निर्माण हुनेछ ।

एक रोपनी ३ आना क्षेत्रफलमा फैलिने भवन साढे २ तलाको १५ कोठे र ६ वटा शौचालय निर्माण गर्ने निर्माणकर्ता कम्पनीले जानकारी दिएको छ । २०६१ सालमा स्थापित निर्वाचन कार्यालय स्याङ्जाले भाडामा बस्दै आएको घरबाट सेवा प्रवाह गर्दे आएको छ ।