स्याङ्जाका एक सहित गण्डकीमा थप ४ जना काेराेना संक्रमितको मृत्यु

स्याङ्जा : गण्डकी प्रदेशमा कोरोना संक्रमणका कारण १ महिलासहित थप ४ जनाको मृत्यु भएको छ । पछिल्लो २५ घण्टामा ४ जनाको मृत्यु भएसँगै गण्डकीमा कोरोना संक्रमणबाट मृत्यु हुनेको संख्या २ सय १५ पुगेको प्रदेश स्वास्थ्य निर्देशनालय गण्डकीले जनाएको छ ।

निर्देशनालयले सोमबार विज्ञप्ति जारी गर्दै मृत्यु हुनेको विवरण पनि सार्वजनिक गरेको छ । मृत्यु हुनेमा स्याङ्जाको वालिङका ५८ वर्षीय पुरुष, म्याग्दीको रघुगंगाका ७८ वर्षीय पुरुष र पोखराका ९१ वर्षीय पुरुष र ५५ वर्षीया महिला रहेका छन् ।

गण्डकीमा गएको २४ घण्टामा १ सय १ संक्रमित फेला परेका छन् । तीमध्ये कास्कीका मात्रै ६९ जना छन् । कास्कीमा हाल सक्रिय संक्रमितको संख्या ७ सय नाघिसकेको छ ।

यसैबीच, पोखरा महानगरपालिकाभित्र संक्रमित दर बढ्दै गएपछि महानगरभित्र निषेधाज्ञा तयारी गरिएको छ ।

काठमाडौं उपत्यकाभित्र आगामी वैशाख १६ देखि निषेधाज्ञा घोषणा गरिएसँगै कोरोनाको उच्च जोखिम कास्कीमा पनि निषेधाज्ञा हुन सक्ने आमसर्वसाधारणको अनुमान बमोजिम जिल्लामा सोको तयारी गरिएको स्रोतले जनाएको छ ।

Facebook Comments Box