वालिङमा डेङ्गुसम्बन्धी जनचेतनामूलक कार्यक्रम गरियो ।

तोलाकान्त बगाले /वालिङ :

वालिङ नगरपालिकाको आयोजनामा बुधबार डेङ्गुसम्बन्धी सचेतनामूलक कार्यक्रम गरिएको छ । लामखुट्टेको टोकाईबाट सर्ने डेङ्गु रोगका विरामीको संक्रमण बढ्दै गएकाले यसको रोकथामका लागि ‘सर्च एण्ड डिष्ट्रोय’ अभियान सञ्चालन गरिएको हो ।

डेङ्गु सार्ने लामखुट्टे रहन सक्ने ठाँउको खोजी गर्दै नष्ट गरिदै । तस्वीर राधाकृष्ण डुम्रे

वालिङ मोडबाट जनप्रतिनिधि, स्वास्थ्यकर्मी, कर्मचारीहरु, सशस्त्र प्रहरी, जनपथ प्रहरी तथा स्थानीयको सक्रियतामा भकुण्डे, भुम्रे, तल्लो वालिङ हुँदै पुनः मोडमा आएर सकिएको थियो ।

सचेतनाका लागि गएको टोलीले वर्कशपहरुमा टायरहरुमा जमेका पानी फाल्नुकासाथै अन्य पानी जमेका स्थानहरुमा ‘ब्लिचिङ पाउडर’ छरिएको थियो भने लामखुट्टे हुन सक्ने संभावित स्थलहरुको खोजी गरिएको थियो ।

वर्कशपमा रहेका टायरहरुमा पानी जम्न नदिन सम्बन्धित ब्यक्तिहरुलाई सचेत गराईएको थियो भने माईकिङमार्फत घर वरीपरी पानी जम्ने स्थानहरुमा पानी जम्न नदिन वा पानीका ड्रमहरु, बाल्टिनहरुलाई छोपेर राख्न सुझाव दिईएको थियो ।

समापन कार्यक्रममा बोल्दै नगर प्रमुख दिलिपप्रताप खाँणले रोग लागेपछि पछुताउनुभन्दा रोग लाग्न नै नदिनु बुद्धिमानी हुने भएकाले सचेत हुन आग्रह गर्नुभयो ।