स्याङ्जामा ३४४ एचआईभी संक्रमित, वालिङ सबैभन्दा धेरै

स्याङ्जा :

: स्याङ्जा जिल्लामा एचआईभी संक्रमितको संख्या तीन सय ४४ पुगेको छ । चालू आर्थिक वर्ष २०८२/८३ को वैशाखसम्म एआरटी (एन्टिरिट्रोभाइरल थेरापी) सेवा लिइरहेका संक्रमितको तथ्याङ्कअनुसार यो संख्या प्रदेश जनस्वास्थ्य कार्यालय स्याङ्जाले सार्वजनिक गरेको हो ।

संक्रमितमध्ये एक सय ८० जना महिला र एक सय ६२ जना पुरुष रहेका छन् । यो संख्या गण्डकी प्रदेशमै कास्कीपछि दोस्रो ठूलो हो ।

कुन स्थानीय तहमा कति ?

तथ्याङ्कअनुसार जिल्लाका ११ स्थानीय तहमध्ये सबैभन्दा धेरै संक्रमित वालिङ नगरपालिकामा छन्, जहाँ ७६ जना संक्रमित उपचारमा छन् । त्यस्तै, पुतलीबजार नगरपालिका र चापाकोट नगरपालिकामा समान ४६/४६ जना, भीरकोट नगरपालिकामा ४१ जना, गल्याङ नगरपालिकामा ४० जना, कालीगण्डकी गाउँपालिकामा २२ जना, बिरुवा गाउँपालिकामा १३ जना, फेदीखोला, आँधीखोला र अर्जुनचौपारी गाउँपालिकामा समान ८/८ जना तथा हरिनास गाउँपालिकामा चार जना संक्रमितले नियमित एआरटी सेवा लिइरहेका छन् ।

यसबाहेक अन्य जिल्लाबाट आएर स्याङ्जामा उपचार गराइरहेका ३२ जना पनि एआरटी सेवामा आबद्ध छन् । एआरटी सेवामा रहेका ३४४ संक्रमितमध्ये पुतलीबजार नगरपालिकाका दुई जना बालबालिका (एक बालिका र एक बालक) रहेका छन् ।

उपचार र सचेतनामा जोड

प्रदेश जनस्वास्थ्य कार्यालय स्याङ्जाका ल्याब टेक्निसिएन अधिकृत तथा एचआईभी कार्यक्रमका फोकल पर्सन पृथ्वी लामिछानेले पछिल्ला वर्षहरूमा संक्रमितहरू नियमित उपचारको पहुँचमा आउन थालेको बताए । “एचआईभी संक्रमण पहिचान भएपछि समयमै एआरटी सेवा सुरु गर्दा संक्रमितले सामान्य जीवनयापन गर्न सक्छन् । त्यसैले संक्रमण लुकाउनेभन्दा परीक्षण, परामर्श र नियमित उपचारमा जोडिनु सबैभन्दा महत्वपूर्ण पक्ष हो,” उनले भने ।

एचआईभी नियन्त्रणका लागि नियमित परीक्षण, समयमै उपचार र सुरक्षित यौन व्यवहार सबैभन्दा प्रभावकारी उपाय हुन् ।

प्रदेश जनस्वास्थ्य कार्यालय स्याङ्जाका प्रमुख जनस्वास्थ्य प्रशासक राम बहादुर नेपालीले एचआईभी नियन्त्रणका लागि उपचारसँगै सचेतना र सुरक्षित व्यवहारलाई सँगसँगै अघि बढाउनुपर्ने बताए ।

“एचआईभी अब उपचार नहुने रोग होइन । समयमै परीक्षण, नियमित औषधि सेवन र सामाजिक विभेद अन्त्य गर्न सकियो भने संक्रमितले सहज रूपमा जीवन बिताउन सक्छन्,” उनले भने ।

नयाँ संक्रमण रोकथामका लागि सुरक्षित यौन व्यवहार, नियमित परीक्षण र समुदायस्तरमा जनचेतना अभिवृद्धि अपरिहार्य रहेको नेपालीले बताए । उनले समुदायमा एचआईभीप्रति रहेको भ्रम हटाउँदै परीक्षण र परामर्श सेवामा पहुँच बढाउन स्थानीय तहसँग समन्वय भइरहेको जानकारी दिए ।

प्रादेशिक जनस्वास्थ्य केन्द्र गण्डकीको तथ्याङ्कअनुसार वैशाखसम्म गण्डकी प्रदेशमा तीन हजार १७१ जना एचआईभी संक्रमित उपचारमा रहेका छन् ।

स्वास्थ्यकर्मीका अनुसार कण्डम परिवार नियोजनको साधन मात्र नभई एचआईभी तथा अन्य यौनजन्य संक्रमणबाट बच्ने प्रभावकारी उपाय हो । त्यसैले यसको प्रयोग र सहज उपलब्धतालाई बढाउन स्थानीय तह, स्वास्थ्य संस्था र समुदायबीचको सहकार्यलाई थप प्रभावकारी बनाउनुपर्ने आवश्यकता औंल्याइएको छ ।

जनस्वास्थ्य कार्यालयले एचआईभी संक्रमणबारे भ्रममा नपरी जोखिमपूर्ण व्यवहार भएका व्यक्तिलाई स्वेच्छिक परीक्षण गराउन र संक्रमण पुष्टि भएमा नियमित एआरटी सेवामा आबद्ध हुन आग्रह गरेको छ ।

Facebook Comments Box

सेरोफेरो

थप सामाग्री

स्याङ्जामा बाँदर आतंक ‘पाकेको बाली भित्राउनै पाउँदैनन् किसान’

सहकारीको ऋण समयमै चुक्ता नगरे कडा कानुनी कारबाही गरिने

वालिङले ‘एक स्वास्थ्य’ नीति लागू गर्ने

समाचार

थप सामाग्री
वालिङमा शिक्षक मेन्टरिङ तालिम सम्पन्न, नवप्रवेशी शिक्षकलाई प्रमाणपत्र
३ दिन अगाडि

वालिङ : वालिङ नगरपालिकाले शिक्षकहरूको पेशागत क्षमता अभिवृद्धि तथा विद्यालय शिक्षाको गुणस्तर सुधार गर्ने उद्देश्यले सञ्चालन गरेको शिक्षक मेन्टरिङ कार्यक्रम…

वालिङले ‘एक स्वास्थ्य’ नीति लागू गर्ने
३ दिन अगाडि
हल गोरु पाल्ने कृषकलाई पाँच हजार
३ दिन अगाडि
स्याङ्जामा सुरक्षित पर्यटक सचेतना अभियान
५ दिन अगाडि

Recent Posts

TOP