आँधीखोला गाउँपालिकाले सबै नागरिकको दुर्घटना बिमा गर्ने
स्याङ्जा :
आँधीखोला गाउँपालिकाले पालिकाका सबै नागरिकको दुर्घटना बिमा गर्ने भएको छ । पालिका गाउँसभाको १५ औ अधिवेशनको नीति तथा कार्यक्रममा पालिका भित्रका १३ हजार ९७० जनाको बिमा गर्ने भनिएको छ ।
हरेक नागरिकको बिमा बापत लाग्ने शुल्क पालिकाले भुक्तानी गर्नेछ भने दुर्घटनामा घाइतेले एक लाख बराबरको औषधी उपचार खर्च पाउने छन् । मृत्यु भएमा एक लाख नगद पालिकाले हस्तान्तरण गर्ने गाउँपालिका अध्यक्ष विश्वनाथ पौडेलले बताउनुभयो ।
हरेक वडामा मोटर बाटो, हरेक वडा कार्यालय बनाएर सङ्घीयताको प्रत्याभूति गरेको पालिकाले यस आर्थिक वर्षमा समेत स्वास्थ्य, शिक्षा र पूर्वाधारमा चासो देखाएको छ ।
पालिकाले शिक्षा क्षेत्रमा सकारात्मक, गुणात्मक, नतिजामूलक परिवर्तन गर्न अध्यक्ष शैक्षिक सुधार कार्यक्रमलाई नीति तथा कार्यक्रममा समेटेको छ । विद्यालयमा विद्यार्थीको पहुँच तथा विद्यार्थी सङ्ख्या समेतको आधारमा आवश्यक मापदण्ड निर्माण गरी विद्यालयको नक्साङ्कन, समायोजन तथा एकीकरण, स्थगन, दरबन्दी मिलान गरी विद्यालय व्यवस्थापन गर्ने नीति अवलम्बन गरिने उल्लेख छ ।
“हाम्रो विद्यालय, राम्रो विद्यालय” निर्माणका निमित्त सम्बन्धित विद्यालय अभिभावक तथा सरोकारवालालाई स्वयम् जिम्मेवार बनाउन प्रयत्न गरिने छ भनिएको छ । विद्यालय भवन, छात्रावास, शौचालय निर्माण, सुरक्षित घेरावार, स्वच्छ खानेपानी, सुरक्षित खेलमैदान, फूलबारी, करेसाबारी, बगैँचा निर्माणजस्ता कामलाई विशेष जोड दिने नीति तथा कार्यक्रममा समेटेको छ ।
पालिकाले स्वास्थ्य सेवाको सर्वव्यापी पहुँच भन्दै गर्भवती तथा सुत्केरी महिला, नवशिशू, बालबालिकाको पोषण परामर्श र गुणस्तरीय स्वास्थ्य सेवासहित गर्भवती महिलाका लागि प्रत्येक महिना स्वास्थ्य संस्था गई गर्भजाँच गराउन प्रोत्साहन साथ अण्डा र क्याल्सियम चक्की वितरण साथै उत्तर प्रसूति जाँच सेवाका लागि घर घरमा गई जाँच गर्ने भनिएको छ ।
दुई बर्षमुनिका बालबालिकाको लागि स्वास्थ्य संस्था, खोप केन्द्र तथा गाउँघर स्वास्थ्य क्लिनिकमार्फत २४ पटकसम्म तौल जाँच गरेको सुनिश्चित गरेबापत प्रोत्साहनको व्यवस्था गरिने नीति तथा कार्यक्रममा समेटिएको छ ।
“बाली बिमा” निःशुल्क बनाई बिमा प्रिमियममा सहुलियत प्रदान गर्दै कृषि उत्पादनमा हुन आउने क्षतिपूर्तिलाई न्यूनीकरण गर्ने नीति पालिकाले लिएको छ । सडक निर्माणको काममा कम्तीमा ५० प्रतिशत स्ट्रक्चरको काम गर्नुपर्ने नीतिलाई निरन्तरता दिएको छ । नयाँ निर्माण गर्नुपर्ने झोलुङ्गे पुल निर्माण र मर्मत सम्भार गरी सञ्चालन हुने झोलुङ्गे पुललाई आवश्यकताअनुसार मर्मत सम्भार गरिने नीति लिएको छ ।
पर्यटनसँग सम्बन्धित क्रियाकलापहरूको समग्र नीतिगत व्यवस्थापन तथा प्रवर्द्धन गर्न पालिकास्तरीय एक पर्यटन विकास समिति गठन गरिने छ । अन्धाअन्धी र श्रवणकुमार क्षेत्रको विकास, प्रचारप्रसार तथा प्रवर्द्धनलाई टेवा पुर्याउन “जाऊँ है अन्धाअन्धी श्रवणकुमार अभियान“ सञ्चालन गर्ने नीति पनि पालिकाले लिएको छ ।
करदातालाई आफूले तिर्नु पर्ने मोटामोटी कर दायित्व र कर तिर्ने समयसीमा समयमै जानकारी दिन निजको सेल नम्बरमा विद्युतीय प्रणालीद्वारा सन्देश प्रवाहित गर्ने नीति पालिकाले लिएको छ ।
समाचार
थप सामाग्री-
२३ वर्षपछि वालिङमा सशस्त्र प्रहरीको आफ्नै स्थायी संरचना बन्ने, जग्गा अधिग्रहण प्रक्रिया सुरु
-
चाडपर्वमा वालिङ प्रहरीको सक्रियता : लागूऔषध,अवैध समान,पटका सहित बिभिन्न व्यक्ति पक्राउ ।
-
सिद्धार्थ राजमार्गमा प्रहरीको अपरेसन: लागूऔषधसहित बागलुङका युवक वालिङमा पक्राउ
-
दुर्घटनामा श्रीमानश्रीमती कै मृत्यु : गुल्मी जिप दुर्घटनामा मृत्यु हुनेको संख्या ७ पुग्यो ।
-
प्रहरी चौकीको पुरानो ब्यानर हटाएर नयाँ राखियो
नेपाली कांग्रेस (देउवा समूह)को बिरुवा गाउँ सभापतिमा कुमार राना
३ हप्ता अगाडि
स्याङ्जा : नेपाली कांग्रेस (देउवा समूह) को बिरुवा गाउँपालिकाको १५ औं नियमित महाधिवेशनले युवा नेता गणेशमान राना (कुमार ) को…


