शिक्षकबाट राजीनामा दिएर कांग्रेस महाधिवेशन प्रतिनिधिको उम्मेदवार

युवराज सुवेदी/स्याङ्जा :

हातमा चक-डस्टर बोकेर गाउँकै विद्यालयलाई इतिहासमै पहिलोपटक एसईईमा शतप्रतिशत सफलता दिलाएका एउटा समर्पित शिक्षक, अब मुलुकको नीति निर्माण गर्ने थलोतिर मोडिएका छन्।

स्याङ्जा गल्याङ–६, पिडिखोलाका झिमलाल चापागाईँ ‘सुयोग’ नेपाली कांग्रेसको १५औँ महाधिवेशनमा स्याङ्जा क्षेत्र नं. २ बाट पेशागत विषय विज्ञतर्फ केन्द्रीय महाधिवेशन प्रतिनिधिमा उम्मेदवार बनेका छन्।

२०७० मा नेविसंघबाट सुरु भएको उनको राजनीतिक यात्रा, पूर्वउपसभापति गोपालमान श्रेष्ठको स्वकीय सचिव र नेविसंघ केन्द्रीय सदस्य हुँदै समृद्ध बनेको छ। गणित विषयका कठिन ठेलीहरूलाई सहजै बुझाएर विद्यार्थीको भविष्य उज्यालो बनाएका सुयोगले शिक्षा दिवसमा नगरस्तरीय उत्कृष्ट शिक्षकको सम्मानसमेत पाए।

“कक्षाकोठामा बुझेको यथार्थ र शिक्षणको बौद्धिक अनुभवलाई अब कांग्रेसको नीति र विचारमा ढाल्न चाहन्छु,” शिक्षणबाट राजीनामा दिएर चुनावी मैदानमा होमिएका सुयोग भन्छन्। उम्मेदवारीसँगै स्याङ्जाली वृत्तमा एउटा बौद्धिक र कर्मठ युवा नेतृत्वको आशा पलाएको छ।