गरिमाको बिरुवा शाखाद्वारा नवज्योति माविमा शैक्षिक पोशाक वितरण

वालिङ, १० फागुन ।
गरिमा विकास बैंक लिमिटेड बिरुवा शाखाले स्याङ्जाको बिरुवा गाउँपालिका १ स्थित नवज्योति माध्यमिक विद्यालयमा शैक्षिक पोशाक वितरण गरेको छ । संस्थागत सामाजिक उत्तरदायित्व अन्तर्गत बैंकले नवज्योति माविमा आईतबार शैक्षिक पोशाक वितरण गरेको हो । विद्यालयमा बाल सिकाई कक्षादेखि ६ कक्षासम्म अध्ययनरत ३९ जना विद्यार्थीलाई शैक्षिक पोशाकस्वरुप ट्रयाकसुट वितरण गरेको हो ।

कार्यक्रममा बिरुवा गाउँपालिका १ का वडा अध्यक्ष राजेन्द्र केसीले गरिमा विकास बैंकले यस विद्यालयलाई प्राथमिकतामा पार्दै सामाजिक उत्तरदायित्व अन्तर्गतको कार्यक्रम राखेर सहयोग गरेकोमा खुसी व्यक्त गर्दै आगामी दिनमा पनि निरन्तरताको अपेक्षा गर्नुभयो ।

कार्यक्रममा गरिमा विकास बैंक लिमिटेडका क्षेत्रीय प्रमुख प्रेमकिशोर अर्यालले बैंकले वर्सेनि नाफाको १ प्रतिशत रकम सामाजिक उत्तरदायित्व अन्तर्गत खर्च गरिरहेको बताउनुभयो ।
गरिमा विकास बैंकले विभिन्न सामाजिक उत्तरदायित्व अन्तर्गत रहेर सहयोगका कार्यक्रमहरु गर्दै आएको बताउँदै विद्यार्थीलाई शैक्षिक पोशाकस्वरुप न्यानो कपडा उपलब्ध गराएको उल्लेख गर्नुभयो ।

Facebook Comments Box