कृषकलाई अनुदानमा गहुँको बीउ

प्रकाश डोटेल/स्याङ्जा :

स्याङ्जाको एक कृषि सहकारीले कृषकलाई अनुदानमा गहुँको बीउ वितरण गरेको छ । वालिङ नगरपालिकामा रहेको अकला नमुना साना किसान कृषि सहकारी संस्थाले सहकारीमा आवद्ध कृषकलाई अनुदानमा गहुँको बीउ वितरण गरेको हो ।

सहकारीले समूहमा आबद्ध शेयर सदस्य कृषकलाई ७५ प्रतिशत अनुदानमा गहुँको बीउ दिएको छ । कृषि ज्ञान केन्द्र स्याङ्जा मार्फत प्राप्त स्वर्गद्धारी र गौतम जातका गहुँको बिउ वितरण गरिएको सहकारीले जनाएको छ । सहकारीले बनाएको ३५५ समूहमा दुई हजार ५४५ जना सेयर सदस्य कृषक आवद्ध छन् ।

५ रोपनी भन्दा बढि क्षेत्रफलमा गहुँ खेती गर्ने कृषकलाई १८ किलोदेखि २५ किलोग्रामसम्म गहुँको बीउ वितरण गरेको सहकारीका प्रबन्धक लक्ष्मी पोख्रेलले जानकारी दिईन् । बजार मुल्य प्रतिकिलो ८५ रुपैयाँ पर्ने गहुँको बीउ ३० रुपैयाँ प्रतिकिलोका दरमा कृषकलाई वितरण गरिएको छ ।

वालिङ नगरपालिकाका १४ वटा वडा र गल्याङ् नगरपालिका वडा नं.–२, ३, ७ र ८ कार्यक्षेत्र रहेको सहकारीले गहुँ, धान, मकै र मौसमी तरकारीका बीउविजन वितरण गर्दै आएको छ । पहिलो चरणमा ७२ जना कृषकले गहुँको बीउ लगेको सहकारीले जनाएको छ ।

सहकारीले डेरी उद्योग समेत संचालन गर्दै आएको छ । शेयर सदस्यले उत्पादन गरेको दुध तथा दुग्धजन्य पदार्थको बजारीकरण बिक्री वितरण गर्दै आएको सहकारी मार्फत उत्पादित छुर्पि विदेश निर्यात हुँदै आएको छ ।

Facebook Comments Box