स्याङ्जाका १० हजार बालबालिकालाई आइपिभी खोप लगाइने

स्याङ्जा :

स्याङ्जामा यस वर्ष १० हजार ९३ जना बालबालिकाका लागि यहि जेठ १३ गतेदेखि २६ गतेसम्म आइपिभी खोप लगाइने भएको छ ।

आइपिभी खोप अभियान सञ्चालन भएसङ्गै २०७३ साल वैशाखदेखि २०७५ असोज महिनासम्म जन्मिएर पोलियो रोग विरुद्धको खोप लगाउन छुटेका बालबालिकालाई खोप लगाइने स्वास्थ्य कार्यालय स्याङ्जाले जनाएको छ ।

जिल्लाका ११ वटै स्थानीय तहमा आइपिभी खोप सञ्चालनका लागि स्वास्थ्य कार्यालय स्याङ्जाले आवश्यक तयारी थालेको स्वास्थ्य कार्यालय स्याङ्जाका प्रमुख जनस्वास्थ्य प्रशासक केशव प्रसाद चापागाईंले जानकारी दिनुभयो ।

बालबालिकालाई आइपिभी खोपबाट बन्चित नहोउन् भन्ने उद्देश्यका साथ ४ सय ५० भन्दा बढी स्थानमा स्वास्थ्यकर्मी तथा स्वयंसेवक खटाइने कार्यालय प्रमुख चापागाईंले बताउनुभयो । स्वास्थ्यकर्मीहरुले विद्यालय, स्वास्थ्यचौकी तथा बालबालिकाको पहुँच पुग्ने ठाउँमा पुगेर खोप लगाउने उहाको भनाइ थियो ।

आइपिभी खोप अभियान सम्बन्धि स्वास्थ्य कार्यालय स्याङ्जाको सभाहलमा आयोजित जिल्ला खोप समन्वय समिती तथा संचारकर्मीहरुका लागि अभिमुखिकरण कार्यक्रममा जिल्लाका सम्पुर्ण स्थानीय तह, अस्पताल, स्वास्थ्यचौकीसङ सहकार्य गरि खोप अभियानलाई प्रभावकारी बनाइने खोप कार्यक्रम संयोजक मनिष कुमार महतोले बताउनुभयो ।

नेपालभर यस वर्ष १४ लाख ६२ हजार सात सय १२ जना बालबालिकालाई पोलियो निवारण गर्ने उद्देश्य पूरा गर्नका लागि आइपिभी खोप अभियान सञ्चालन गरिएको बताउँदै स्याङ्जामा पनि सबै बालबालिकालाई खोप लगाउने तयारी रहेको स्वास्थ्य कार्यालय स्याङ्जाले जनाएको छ ।

कार्यक्रममा जिल्ला समन्वय समिति स्याङ्जाका उपप्रमुख खड्कराज सुवेदी, पत्रकार महासंघ स्याङ्जाका अध्यक्ष श्रीकृष्ण सिग्देल लगायतले शुभकामना मन्तव्य व्यक्त गर्नुभएको थियो ।

कार्यक्रममा जिल्ला खोप समन्वय समितिका पदाधिकारी र स्याङ्जाका क्रियाशिल संचारकर्मीहरुको सहभागिता थियो । जिल्ला समन्वय समिति स्याङ्जाका प्रमुख एवं खोप समन्वय समितिका अध्यक्ष श्रीप्रसाद जिटीको अध्यक्षतामा सम्पन्न कार्यक्रमको सहजीकरण खोप कार्यक्रम संयोजक मनिष कुमार महतोले गर्नुभएको थियो ।

Facebook Comments Box