स्याङजामा मनाइयो कर दिवस तथा कर सप्ताह कार्यक्रम

स्याङ्जा ६ मंसिर । स्वच्छ, पारदर्शी र प्रबिधिमैत्री कर प्रशासन, सामाजिक न्याय, आर्थिक समृद्धि र सुसासन भन्ने नाराका साथ १२ औ कर दिवस मनाइएको छ ।

करदाता सेवा कार्यालय पुतलीबजारको आयोजनामा उत्कृष्ठ करदाता सम्मान तथा कर सचेतनामूलक वक्तृत्वकला प्रतियोगिता एवं छोटो बृत्तचित्र निर्माण प्रतियोगिता सहित कर दिवस तथा कर सप्ताह कार्यक्रम मनाइएको हो ।

दिवसको उदघाटन कार्यक्रममा बोल्दै प्रमुख जिल्ला अधिकारी शशीधर घिमिरेले कर प्रणालीलाई बलियो बनाउदै यसका उपयोगिताका बारेमा प्राथमिकीकरण गर्न आवश्यक रहेको बताउनुभयो । ब्यवसाय गरे वापत नागरिकले बुझाएको करबाटै विकास निर्माण लगायत सामाजिक सुरक्षामा लगानी गर्दै आएको उहाले बताउनुभयो । सामाजिक सुरक्षा, स्वास्थ्य सेवा, पूर्वाधार विकास, शिक्षा लगायतका क्षेत्रका लगानी गर्ने गरेको जनाउदै राज्यले उद्यम, ब्यवसायमा ध्यान दिनु पर्ने उहाँको भनाई छ ।

कार्यक्रममा आन्तरिक कर कार्यालय पोखराका प्रमुख शिव शर्माले करको उपयोग र करको आवश्यकताका बारेमा जानकारी गराउदै पुतलीबजारमा स्थापित करदाता कार्यालयबाट जिल्लाबासीलाई सहज बनाएको बताउनुभयो ।उद्योग वाणिज्य संघ स्याङ्जाका अध्यक्ष रविन्द्रमान श्रेष्ठ, च्याम्बर अफ कमर्श स्याङ्जाका प्रथम उपाध्यक्ष राजु अधिकारी लगायतले शुभकामना मन्तब्य सहित ब्यावसायिक समस्याका बारेमा जानकारी गराउनु भएको थियो .

सोही कार्यक्रममा खिलुङकालिका कन्स्ट्रक्सनका प्रवन्धक दिपक अर्याललाई उत्कृष्ठ करदाता सम्मान गरिएको छ । यसैगरी करदाता सेवा कार्यालयका डाटा इन्ट्री सुब्बा सुभासचन्द्र मरासीनीलाई सम्मान गरिएको छ ।

वक्तृत्वकला प्रतियोगितामा प्रथम, द्धितिय र तृतीय हुने क्रमश ः ओजश्वी रेग्मी, आयुष्मा ढकाल र एलिसा केसीलाई नगद पुरस्कार सहित सम्मान गरिएको छ । छोटा भिडियो बनाएका रोशनी केसीका समूहलाई पनि सम्मान गरिएको थियो ।

करदाता कार्यालय प्रमुख बिजय भुषालको अध्यक्षतामा सम्पन्न कार्यक्रममा सुब्बा ममता पंगेनीले संचालन गर्नुभएको थियो ।

Facebook Comments Box
TOP