गल्याङ : फोहोरमैला दीर्घकालीन ब्यबस्थापनका लागि सरोकारवाला संग छलफल

गल्याङ :

स्याङ्जाको गल्याङ नगरपालिकाले फोहोरमैला दीर्घकालीन ब्यबस्थापनका लागि पालिकाभित्र कृयाशिल सस्थागत प्रतिनिधि र सरोकारवाला वीच छलफल गरेको छ । नगर प्रमुख गुरु प्रसाद भट्टराईको अध्यक्षतामा सरोकारवाला वीच छलफल गरी फोहोर व्यवस्थापनको दीर्घकालिन समाधानबारे अन्तरक्रिया भएको हो ।

अन्तरक्रियाले नगरपालिकाको फोहोर दीर्घकालिन व्यवस्थापन गर्ने रणनीति बनाउन भन्दै सुरेश सुवेदीको अध्यक्षतामा गल्याङ नगर सरसफाइ समिति पनि गठन गरेको छ । गल्याङ उद्योग वाणिज्य संघ, गल्याङ चेम्बर अफ कमर्स र सरोकारवालाहरु समेत समेटिएको छ सदस्यीय समिति गठन गरिएको हो ।

समितिमा सुरेश सुबेदी संयोजकसँगै सदस्यहरुमा गल्याङ उद्योग वाणिज्य संघका अध्यक्ष डोलप्रसाद श्रेष्ठ ध्रुब, गल्याङ चेम्बर अफ कमर्सका बरिष्ठ उपाध्यक्ष पूर्णबहादुर रानाभाट अर्जुन, स्थानीय सरोकारवालाहरुबाट निर्मल भट्टराई र राजु बस्याल तथा गल्याङ नगरपालिकाको तर्फबाट सदस्य सचिवको रुपमा थानापति न्यौपाने रहनुभएको छ । यस्तै, शिब गाहा र रमेश अर्याललाई समितिको सल्लाहकारको रुपमा राखिएको छ ।

हिजो गठन गरिएको समितिलाई फोहोर व्यवस्थापनका लागि फोहोर फाल्ने स्थानको खोजी गर्ने जिम्मेवारी समेत दिइएको छ । यसअघि नगरपालिकाले फोहोर फाल्ने स्थानको खोजी गरेपनि उचित ठाउँ फेला पार्न नसकेपछि बजारमा फोहोर थुप्रिन थालेको छ ।यसैबीच, समितिका संयोजक सुरेश सुबेदीले गल्याङबजारको फोहोर व्यवस्थापनका लागि तयारी सुरु गरिसकिएको बताउनुभएको छ ।

सुबेदीले केहि दिनका लागि फोहोर व्यवस्थापन गर्न भोलि सहमति भएमा भोलि देखि बजारको फोहोर उठ्ने विश्वास व्यक्त गर्नुभयो । वातारणीय संरक्षण युवा मञ्च तथा स्थानीयले छरछरेमा फोहोर फाल्न रोकेपछि फोहोरको व्यवस्थापन हुन नसकेको हो । यसअघि वातारणीय संरक्षण युवा मञ्च तथा स्थानीयले २५ दिनको समय सिमा दिएर फोहोर व्यवस्थापन गर्ने ठाउँको खोजी गर्न भनेपनि नगरपालिकाले भने फोहोर व्यवस्थापन गर्ने स्थान भेट्न सकेको थिएन ।

यस्तै, गल्याङ नगर सरसफाइ समितिको पहिलो बैठक बसी बजारको फोहोरलाई कुहिने र नकुहिने वर्गिकरण गरेर मात्रै उठाउने निर्णय पनि गरेको छ । फोहोरको पूनप्रयोग र सहि व्यवस्थापनका लागि भन्दै समितिले फरक दिन फरक फरक फोहोर उठाउने निर्णय गरेको हो ।

Facebook Comments Box