नगरपालिकाले दियो उद्यम सामग्री

स्याङ्जा :

पुतलीबजार नगरपालिकाले गरिबी निवारणका लागि लघुउद्यम विकाससम्बन्धी प्रशिक्षणसँगै उद्यम सामग्री प्रदान गरेको छ । सहभागीका माग अनुरुपमा उद्यमसँग सम्बन्धित उपकरण दिइएको हो ।
नगरपालिकाको आयोजनामा प्रविधि र लघुवित्तमा पहुँच सहित बजारीकरणमा सहजीकरणसम्बन्धी २ दिने प्रशिक्षण दिएको थियो ।
नगर उपप्रमुख देवी अर्यालले सहभागीलाई सामग्री हस्तान्तरण गरिन् । सहभागीका माग बमोजिम बाख्रापालन, मौरीपालन, च्याउखेती, चुरापोते, सिलाइकटाइका लागि आवश्यक सामग्री दिइएको उपप्रमुख अर्यालले बताउनु भयाे ।
सामग्री हस्तान्तरण गर्दै उपप्रमुख अर्यालले भन्नुभयाे, ‘तपाईंहरु उद्यमी बनेर आर्थिकोपार्जन गरेको हेर्न मन छ । तपाईंहरु घरमै बसेर पनि उद्यम सञ्चालन गर्न सक्नुहुन्छ । यसका लागि नगरपालिका सहयोग गर्न तयारी छ । राम्रो उत्पादन गर्नुहोस् । प्रशिक्षणमा सिकेका ज्ञान र सीपलाई व्यवहारमा उतार्नुहोस् । युवाशक्ति उद्यममा जोड्नुहोस् ।’
नेपाल बैंक लि. प्रमुख विष्णु खनाल, पर्यटन तथा उद्योग कार्यालयमा प्रमुख ठाकुरप्रसाद ढकाल, पुतलीबजार नगरपालिका प्रशासन अधिकृत धनप्रसाद कोइराला, उद्यमी चन्द्रशोभा रानाले उद्योग र उद्यम र वित्तीय कारोबारबारे प्रशिक्षण दिएका थिए ।

प्रशिक्षणमा नगरपालिका अन्तर्गतका ५ वटा वडाका ७३ जना महिला तथा पुरुष सहभागी थिए ।

Facebook Comments Box