स्याङ्जाका १० पालिकामा शिक्षक संघको नेतृत्व चयन

वालिङ :
स्याङ्जाका १० ओटा पालिकामा नेपाल शिक्षक संघको अधिवेसन सम्पन्न भएको छ । ११ पालिका रहेको जिल्लामा वालिङ नगरपालिका बाहेक सबै पालिकामा शिक्षक संघकोे अधिवेसन सम्पन्न भएको हो । संघियता जारी भएपछि बनेको स्थानीयतहमा दोस्रो पटक शिक्षक संघको अधिवेसन भएको छ । शिक्षक संघ स्याङ्जाको विभिन्न पालिकामा भएको दोस्रो अधिबेशनले नेतृत्वमा नयाँ कार्यसमिति सर्वसम्मत रूपमा चयन भएको संघले जनाएको छ । संघको १० पालिकामा सम्पन्न भए अनुसार फेदिखोलामा शोभा थापा, पुतलीबजारमा लेखनाथ शर्मा, अर्जुनचौपारीमा बिष्णु प्रसाद चापागाँई, आँधीखोलामा जगदिश पौडेल, बिरुवामा राजु वाग्ले र भीरकोटमा चोलाकान्त काफ्लेको नेतृृत्वमा सर्वसहमतिमा नेतृत्व चयन भएका छन् । त्यसैगरी गल्याङ्मा लेखनाथ चापागाँई, चापाकोटमा गोपाल रेग्मी, कालीगण्डकीमा भीम थापा र हरिनासमा सुरज मानन्धरको नेतृत्वमा सर्वसहमतिमा पालिका कार्यसमिति चयन भएको संघले जनाएको छ ।

पालिकाको वडा अनुसार सदस्य चयन हुने व्यवस्था संघको ऐनमा छ । ऐनमा व्यवस्था भए अनुसार अधिवेसन सम्पन्न भएका पालिकामा कार्यसमिति चयन भएको शिक्षक संघका उपाध्यक्ष सीता गौडेल गैह्रेले जानकारी दिइन् । उनका अनुसार वालिङ बाहेक सबै पालिकामा सर्वसहमतिमा कार्यसमिति चयन भएको बताईन । वालिङ नगरपालिकामा नेतृत्वमा ३ जना आकांक्षी देखिएकाले सहमति जुट्न नसक्दा अधिवेसन सम्पन्न हुन सकेन उपाध्यक्ष गैह्रेले भनिन् । वालिङको पनि छिट्टै सर्वसहमतिमा नटुङ्गाउने प्रयास भइरहेको उनको भनाई छ ।

शिक्षक संघको जिल्ला कार्यसमितिको आगामी २८ गते शनिवार गर्ने भनिएको जिल्ला अधिवेसन स्थगित भएको जनाएको छ । सबै पालिकाहरुबाट मतदाता नामावली आउन ढिलाई भएको र वालिङ नगरपालिकाको अधिवेसन सम्पन्न हुन नसकेपछि संघले २८ गते गर्ने भनिएको जिल्ला अधिवेसन स्थगित गरिएको संघका जिल्ला अध्यक्ष लक्ष्मी रेग्मीले जानकारी दिए । २८ गतेसम्म मतदाता नामावली तयार गर्ने योजनामा छौं उनले भने,‘सो समय सम्म सम्पन्न हुननसकेका पालिकाको अधिवेसन सक्ने छौं ।’ फागुनको पहिलो साताभित्र जिल्ला अधिवेसन सम्पन्न गर्नेगरी संघ अगाडी बढेको छ उनले भने । सरकारी कर्मचारी शिक्षकहरुको अर्गानाईजेसन नेपाल शिक्षक संघ लोकतन्त्रवादी शिक्षकहरुको संगठन हो । अहिले सम्म यो संगठनमा कति शिक्षक आवद्धता छन् भन्ने बिषय सार्वजनिक गर्न सकेको छैन ।Public aawaj