‘सन् २०२२ मा नेपालमा प्रेस स्वतन्त्रता हननका ५३ घटना।

काठमाण्डौ:
सन् २०२२ प्रेस तथा अभिव्यक्ति स्वतन्त्रताको सवालमा निकै नै चुनौतीपूर्ण वर्ष बनेको छ। यो वर्ष नेपालमा प्रेस स्वतन्त्रता हननका ५३ वटा घटना घटेको उल्लेख गर्दै नेपाल पत्रकार महासंघले सन् २०२२ चुनौतीपूर्ण रहेको बताएको हो।

ती ५३ वटा घटनामा १३२ पुरुष र १८ महिला पत्रकारसहित ६ वटा सञ्चारसंस्था प्रभावित भएका नेपाल पत्रकार महासंघले जनाएको छ। महासंघको प्रेस स्वतन्त्रता अनुगमन शाखाको अभिलेखअनुसार सन् २०२१ मा प्रेस स्वतन्त्रता हनन्का ६२ वटा घटना अभिलेख भएका थिए। जसबाट १९० पत्रकार र चार सञ्चारमाध्यम प्रभावित भएका थिए।

नयाँ प्रविधि र शैलीको विकाससँगै प्रेस तथा अभिव्यक्ति स्वतन्त्रताविरुद्धका घटनामा पनि नयाँ नयाँ तरिका अपनाइएको पाइएको महासंघले विज्ञप्तीमार्फत् जनाएको छ। सन् २०२२ मा अनलाइन सञ्चारमाध्यमको सिएमएसमा अनधिकृत प्रवेश गर्ने, संगठित रूपमा अनफलो अभियान चलाउने, सामाजिक सञ्जालमार्फत धम्की दिने, सामाजिक सञ्जाललाई बन्द गर्न प्रयास गर्ने र विमुख बनाउने तथा ह्याक गर्ने काम भएको विज्ञप्तीमा उल्लेख छ।

Facebook Comments Box