रूपन्देहीमा दुईवटा मोटरसाइकल ठोक्किदा खाँदा दुई बालबालिकाको मृत्यु ।

बुटवल:
रूपन्देहीको तिलोत्तमा नगरपालिका गोरकटामा दुईवटा मोटरसाइकल एकआपसमा ठक्कर खाँदा दुईजना बालबालिकाको मृत्यु भएको छ।मणिग्रामबाट गोरकट्टातर्फ जाँदै गरेको र गोरकट्टाबाट मणिग्रामतर्फ जाँदै गरेको मोटरसाइकल एकआपसमा ठक्कर खाँदा उक्त दुर्घटना भएको प्रहरीले जनाएको छ।

लु १६ प ६१३० र लु २८ प ४३७३ नम्बरको मोटरसाइकल आइतबार साँझ ६ बजेतिर एकआपसमा ठक्कर खाएको प्रहरीले जनाएको छ। जिल्ला प्रहरी कार्यालय रूपन्देहीका अनुसार मृत्यु हुनेमा तिलोत्तमा ३ शंकरनगरकी १२ वर्षीया समीक्षा खराल र ७ वर्षीय सुग्रीम खराल छन्।

त्यसैगरी दुर्घटनामा परी सुद्धोधन-३ का ३४ वर्षीय सुरज काफ्ले र तिलोत्तमा-३ की कमला खराल घाइते भएको प्रहरीले जनाएको छ। उनीहरूको मणिग्रामस्थित क्रिमसन अस्पतालमा उपचार भइरहेको छ।मृतक दुईजना बालबालिका र घाइते कमला खराल सुरज काफ्लेले चलाएको लु १६ प ६१३० नम्बरको मोटरसाइकलमा सवार थिए।

दुर्घटनामा परी लु २८ प ४३७३ नम्बरको मोटरसाइकल चालक बुटवल -७ दीपनगर बस्ने २६ वर्षीय सुजन थापा र पछाडि बसेका सुभास खनाल सामान्य घाइते छन्।

दुई मोटरसाइकल ठक्कर खाएपछि लु १ क ३०६४ नम्बरको मिनी ट्रकमा समेत ठोक्किएको प्रहरीले जनाएको छ।