संखुवासभा बस दुर्घटनाका मृतकको संख्या १४ पुग्यो ।

काठमाण्डौ:
संखुवासभाको मादी नगरपालिका– ६ मा आज बिहान बस दुर्घटनामा परेर मृत्यु हुनेको संख्या १४ पुगेको छ । मादी– ६ को सातघुम्तीमा भएको बस दुर्घटनामा परेर हालसम्म १४ जनाको मृत्यु भएको जिल्ला प्रहरी कार्यालयका प्रमुख प्रहरी नायब उपरीक्षक लालध्वज सुवेदीले जानकारी दिए ।

आज बिहान ७.३० बजे मादीको ओखरबोटे बजारबाट झापाको दमकतर्फ जाँदै गरेको बा.४ख ७३५ नम्बरको बस दुर्घटनामा परेको हो । मृतकको अझै सनाखन हुन सकेको छैन । बस दुर्घटनामा परेका पाँचजनाको जीवितै उद्धार गरिएको प्रहरीले जनाएको छ । बसमा करिब १९ देखि २१ जना यात्रु सवार रहेको अनुमान गरिएको छ ।

बस सडकबाट करिब तीन सय मिटर तल खसेको छ । घटनास्थलमा सशस्त्र प्रहरी, नेपाल प्रहरी र स्थानीयले उद्धार गरिरहेका छन् । के कारणले बस दुर्घटनामा परेको हो भन्ने खुलेको छैन। दुर्घटनाबारे अनुसन्धान भइरहेको प्रहरीले जनाएको छ ।

Facebook Comments Box