इराकविरुद्ध नेपाल पराजित,नेपालको दुई गोल

शनिबार राती इराकको बसरामा भएको मैत्रीपूर्ण खेलमा घरेलु टिम इराक विरुद्ध नेपाल ६-२ गोलले पराजित भएको छ।

खेलको सातौं मिनेटमा नै घरेलु टिम इराकले कप्तान अली अब्दुल जहर खासिनको फ्रिकिकमा अग्रता लिएको थियो। त्यसको एक मिनेट नबित्दै नेपालले बराबरी गोल फर्कायो। आठौं मिनेटमा अन्जन विष्टको प्रहार क्लियर गर्ने क्रममा इराकका डिफेन्डर अब्राहम खलाफले आफ्नै पोस्टमा गोल गरेका थिए। ३० औं मिनेटमा डेब्यू खेलाडी मनिष डाँगीको गोलमा नेपालले खेलमा अग्रता लियो। सन्तोष तामाङको पासलाई डाँगीले इराकका गोलरक्षक अघि बढेको फाईदा उठाएका थिए। ४०औँ मिनेटमा मोहमद अब्दुल्जारा हेडमार्फत इराकले बराबरी गोल फर्कायो। अर्को मिनेटमा इराकले अयमन हुसेनको गोलमा तेस्रो गोल थपेको थियो। यस्तै पहिलो हाफको इन्जुरी समयमा हुसेनले व्यक्तिगत दोस्रो गोल गर्दै इराकको लागि चौथो गोल थपे । ६८ र ७४ मिनेटमा थप गोल गर्दै इराकले अग्रता ६(२ मा पुर्‍याएको थियो ।

यस मैत्रीपुर्ण खेल पछि नेपाल इराकबाट विश्वकप छनोट प्रतियोगिता खेल्नका लागि कुवेत प्रस्थान गर्नेछ। एसियन महारथि इराक पुर्व एसियन च्याम्पियन विजेता साथै विश्वकप खेलिसकेको टिम हो । फिफा वरीयतामा नेपाल भन्दा १०३ माथि रहेको इराक ६८ औं स्थानमा छ भने नेपाल १७१औं स्थानमा छ। आफुभन्दा निकै माथिल्लो टिम सँगको खेलले नेपाललाई विश्वकप छनोट प्रतियोगितामा निकै राम्रो अनुभव हुनेछ भन्नेमा नेपाल सकारात्मक रहेको छ ।

Facebook Comments Box