स्याङ्जाको उत्तरबाहिनीमा अब प्राकृतिक चिकित्सालय बन्ने

कृष्ण समीप/स्याङ्जा : जिल्लाको उत्तरबाहिनी क्षेत्रलाई धार्मिक पर्यटकीय क्षेत्रका रूपमा विकास गर्न कालीगण्डकी ज्ञान विज्ञान प्रतिष्ठानले योजनाबद्ध काम थालनी गरेको छ । यस क्षेत्रलाई प्राकृतिक चिकित्सालयको रूपमा विकास गर्न प्रतिष्ठानले काम थालेको हो ।

स्याङ्जाको गल्याङ नगरपालिका १ मा मालुङ्गामा पर्ने उत्तरबाहिनी क्षेत्रलाई पौराणिक, धार्मिक तथा सांस्कृतिक क्षेत्रको रूपमा चिनिन्छ । ठाउँ भएर बग्ने कालिगडण्की नदी दक्षिणबाट उत्तरतर्फ बगिरहेको दृश्य देखिन्छ । यो दुर्लभ दृश्यका कारण यो क्षेत्रलाई उत्तरबाहिनी भनिएको हो ।

धार्मिक पर्यटकीय क्षेत्रको रूपमा रहेको यो क्षेत्रलाई प्राकृतिक चिकित्सालयको रूपमा विकास गर्न कालिगण्डकी ज्ञान विज्ञान प्रतिष्ठानले तयारी थालेको अध्यक्ष चैतन्य कृष्ण बताउनुहुन्छ ।

गरिब, असहायका लागि निःशुल्क उपचार गर्ने उदेश्यका साथ स्थापनाको तयारी थालिएको प्राकृतिक चिकित्सालय स्थापनामा वालिङ नगरपालिले पनि साथ दिने मेयर दिलिप खाण ठकुरीको भनाइ छ ।

प्राकृतिक चिकित्सालयको स्थापना गर्ने उदेश्यले गरिएको कार्यक्रममा विभिन्न क्षेत्रका व्यक्तिहरूको सहभागिता थियो । प्रतिष्ठानको योजनामा बन्न लागेको उक्त चिकित्सालय निर्माणले उत्तरबाहिनीको महत्वलाई झन बढाउने सहभागीहरूको विश्वास छ ।