त्रिदेशीय कपको उपाधि नेपाललाई, बंगलादेश २-१ ले पराजित

काठमाडौं : ‘त्रिदेशीय कप’ फुटबल प्रतियोगिताको उपाधि नेपालले जितेको छ ।

सोमबार बेलुकी दशरथ रङ्गशालामा भएको फाइनलमा बंगलादेशलाई २/१ ले पराजित गर्दै नेपालले उपाधि जितेको हो ।

नेपालका लागि खेलको १८ औं मिनेटमा संजोग राईले तथा ४१ औं मिनेटमा विशाल राईले गोल गर्दै नेपाललाई २/० ले अग्रता दिलाएका थिए ।

तर खेलको ८३ औं मिनेटमा बंगलादेशले एक गोल फर्काएको थियो । नेपालले ३७ वर्षपछि बंगलादेशलाई दशरथ रङ्गशालामा फाइनलमा पराजित गर्दै उपाधि जितेको हो । संजोग म्यान अफ द फाइनल बन्न सफल भएका छन् ।

जितसँगै नेपालले ट्रफीसहित पाँच हजार अमेरिकी डलर जितेको छ । विजेतालाई प्रधानमन्त्री केपी शर्मा ओलीले पुरस्कार वितरण गर्नुभयाे ।

किर्गिस्तानको २३ वर्ष मुनिको टिमसमेत सहभागी प्रतियोगितामा बंगलादेश ४ अंकसहित लिगको विजेता बन्दै र नेपाल २ अंकसहित उपविजेता बन्दै फाइनलमा पुगेको थियो ।

नेपालले दुबै टिमसँग गोलरहित बराबरी खेलेको थियो भने बंगलादेशले किर्गिस्तानलाई १/० ले हराएको थियो ।