भेषजबिन्दु साहित्यिक पुरस्कार प्रा.डा. तिमल्सेनालाई।

 २८ कार्तिक २०७७, शुक्रबार १९:००   | आँधीखोला समाचार डेस्क

भेषजबिन्दु साहित्यिक पुरस्कार प्रा.डा. तिमल्सेनालाई।

वालिङ : भेषजराज साहित्य प्रतिष्ठानले वितरण गर्दै आएको भेषजविन्दु साहित्यिक पुरस्कार प्रा.डा.पशुपति तिमिल्सेनालाई दिने निर्णय गरेको छ । २०७४ सालदेखि प्रदान गर्दै आएको भेषजविन्दु साहित्यिक पुरस्कार प्रदान गर्नका लागि प्रा.डा. रविलाल अधिकारीको संयोजकत्वमा प्रतिष्ठानका संस्थापक सल्लाहकारहरु कवि मित्रलाल पंज्ञानी र महाकाव्यकार माधव वियोगी सदस्य रहेको तीन सदस्यीय प्रतिभा छनोट समिति गठन गरिएको थियो । सो समितिले प्रतिभा प्रा. डा. तिमल्सेनालाई यस वर्षको भेषजबिन्दु साहित्यिक पुरस्कार प्रदान गर्ने निर्णय गरेको हो । उक्त पुरस्कार आगामी मङ्सिर ६ गते शनिबारका दिन प्रतिष्ठानका नायक स्व.भेषजराज शर्माको जन्मजयन्तीको अवसर पारेर प्रदान गर्ने भएको छ । पुरस्कारको राशी १० हजार नगद, दोसल्ला र प्रमाणपत्र रहेको आयोजकले जनाएको छ । प्रतिष्ठानले यस अघि २०७४ मा केदार शर्मा ढकाललाई २०७५मा देवेन्द्र लम्साललाई र २०७६मा मित्रलाल पंज्ञानीलाई उक्त पुरस्कारद्वारा पुरस्कृत गरिसकेको छ । प्रतिष्ठानले भेषजराज साहित्य सम्मान पनि प्रदान गर्दै आएको छ । यस अघि २०७४ सालमा पीताम्बर नेपाली र देवीप्रसाद वनवासीलाई २०७५ मा सूर्य डुम्रेलाई र २०७६ सालमा चिन्तु गिरीलाई प्रदान गएिको उक्त सम्मान यस पटक डा. श्यामप्रसाद न्यौपानेलाई प्रदान गर्ने निर्णय गरेको छ ।
यसै गरी स्याङ्जाको वालिङमा शनिबार भेषजराज साहित्य प्रतिष्ठानले रचना वाचनको ३० औँ शृङ्खला एक साहित्यिक कार्यक्रमका साथ सम्पन्न गरेको छ । भेषजराज साहित्य प्रतिष्ठानको आयोजनामा सञ्चालन गरिएको उक्त कार्यक्रममा आमन्त्रित व्यक्तित्व कवयित्री दमकला बगालेले मैले ६५ वर्षको उमेरमा क,ख सिकेर आज पढ्न,लेख्न र कविता सृजना गर्न सक्ने भएको छु भन्दै सबैलाई अध्ययन र सृजनातर्फ लाग्न आग्रह गरेकी छन् । कार्यक्रममा वैकल्पिक बाटो पृथक पाइला २०७६ स्याङ्जाका अभियन्ता मिलन समीरले साहित्य आफ्नै गाउँघरको परिवेशको सरल र सहज खालको हुनुपर्ने बताए । कार्यक्रममा श्रवण कुमार प्रतिष्ठानका अध्यक्ष सीताराम अधिकारी, कविहरु खुमकान्त अर्याल, नारायणप्रसाद रेग्मी, किशोर पाठक, विष्णु पंगेनी, सागर काफ्ले, प्रमोद काफ्ले लगायत दुई दर्जन स्रटाहरुले आआफ्ना रचना प्रस्तुत गरेका थिए । भेषजराज साहित्य प्रतिष्ठानका अध्यक्ष यमकान्त खनालको अध्यक्षतामा सम्पन्न उक्त कार्यक्रमको सञ्चालन प्रतिष्ठानका सचिव श्यामप्रसाद ढुङ्गानाले र स्वागत उपाध्यक्ष विष्णुप्रसाद अर्यालले गरेका थिए ।

Facebook Comments
यो पनि पड्नुहोस..  निख्लो (निस्तो) सहानुभूति ।

अन्तिम अपडेट: २८ कार्तिक २०७७, शुक्रबार १९:००





-->