पुतलीबजार नगरपालि किसानलाई अनुदानमा हाते ट्याक्टर

भवानी अधिकारी/स्याङ्जा :

कृषिमा यान्त्रिकरणको उपयोग गर्दे उत्पादन बढाउने उदेश्यले पुतलीबजार नगरपालिकाले अनुदानमा किसानलाई हाते ट्याक्टर (मिनीटिलर) प्रदान गरेको छ ।

नगरका १४ वटा वडा सबैलाई समेटिनेगरीे नगरपालिकाले ८५ प्रतिशत अनुदानमा ट्याक्टर उपलब्ध गराएको हो ।

नगरभित्रका ब्यवसायिक किसानलाई ५० वटा हाते ट्याक्टर प्रदान गरेको नगर प्रमुख सीमा क्षेत्रीले बताईन् । ‘आधुनिक उपकरण र प्रबिधिको उपयोग गर्दे कृषिमा आत्मनिर्भर बनाउने उदेश्यले किसानलाई हाते ट्याक्टर उपलब्ध गराएका हौं ’ उनले भनिन्, ‘गाउँघरमा गोरु पाल्ने चलन कम हुदै गयो, कृषिमा जोड दिई उत्पादन बढाउने हाम्रो प्रयास हो ।’

नगरपालिकाले ५० वटा ट्याक्टर बितरण गरेको हो । उपलब्ध गराइएका ती ट्याक्टरले आफना खेत बारी जोत्न र आवश्यक भएमा छिमेकीलाई समेत सहयोग गर्न दिनेगरी वितरण गरेको नगरपालिकाले जनाएको छ ।

डिजेलबाट चल्ने हाते ट्याक्टर ६ हर्स पावरको भएको जनाइएको छ । नगरपालिकाले प्रति ट्याक्टर ५४ हजार ५ सयमा खरिदगरी किसानका लागि ८ हजार १ सय ७५ रुपैंयामा उपलब्ध गराएको नगरपालिकाका कृषि विकास अधिकृत मनिषा लामिछानेले जानकारी दिईन् । ट्याक्टर पुरुषले मात्र नभई महिलाले पनि चलाउन सक्छन् ।

कृषिमा यान्त्रीकरण गरी उत्पादन बढाउने र लागत घटाउने उद्देश्यले नगरपालिकाले किसानलाई हाते ट्याक्टर प्रदान गरेको निमित्त प्रमुख प्रशासकिय अधिकृत प्रमुख ताराचन्द्र ढकालले बताए ।

Facebook Comments Box