कोरोनाविरुद्ध एकढिक्का भएर लाग्न राष्ट्रपति भण्डारीको आह्वान

काठमाडौं : राष्ट्रपति विद्यादेवी भण्डारीले कोरोना भाइरसको संक्रमणविरुद्ध एकढिक्का भएर लाग्न सबैलाई आह्वान गरेकी छन् ।

संघीय संसदको संयुक्त बैठकमा शुक्रबार नीति तथा कार्यक्रम प्रस्तुत गर्दै राष्ट्रपति भण्डारीले सबैलाई एकढिक्का भएर लाग्न आह्वान गरेकी हुन् ।

राष्ट्रपति भण्डारीले भनिन्, ‘नेपाल सरकारले चालेको कदममा साथ दिई सहयोग गर्नुभएकोमा सबैमा हार्दिक धन्यवाद प्रदान गर्दछु । संक्रमण थप फैलिन नदिन र महामारी फैलिन नदिनका लागि सबैलाई आग्रह गर्दछु ।’

राष्ट्रपति भण्डारीले अग्रपंक्तिमा रहेर खटिएकाहरु सबैलाई धन्यवाद दिँदै कोभिड–१९ का कारण मौजुदा स्वास्थ्य सुविधा अपर्याप्त देखिएकाले स्वास्थ्य पूर्वाधार र रोजगारी प्राथमिकता रहेको उल्लेख गरिन् ।

यस महामारीबाट हुने आर्थिक क्षतिको पूर्ति आगामी दिनमा हुनसक्ने भन्दै उनले मानव जातिको संरक्षण सरकारको सर्वोच्च कर्तव्य रहेको बताइन् ।

Facebook Comments Box