शिक्षा क्षेत्रका धरोहर समाजसेवी प्रेम नारायण अर्यालको निधन

आँधीखोला खबर/स्याङजा :
शिक्षाविद प्रेम नारायण अर्यालको ७४ बर्षको उमेरमा निधन भएको छ । स्याङजा जिल्लाको शिक्षा क्षेत्रको बिकासका लागि महत्वपूर्ण योगदान पुर्याउनु भएका अर्यालको काठमाण्डौंमा उपचारका क्रममा सोमवार निधन भएको हो । अर्याल विगत १ महिना देखि टियु शिक्षण अस्पतालमा फोक्सोको उपचार गराईरहनु भएको थियो ।
कालिका मावि तथा कालिका क्याम्पस हेलुका पूर्ब प्राचार्य स्वर्गीय अर्यालले पूर्णामृत भवानी लगायतका बिद्यालयमा शिक्षण गर्नु भएको थियो ।
वालिङको पाईनिअज हायर एजुकेशन एकेडेमी तथा पाईनिअज क्याम्पसका संस्थापक अध्यक्ष अर्याल, कालिका सामुदायिक अस्पताल हेलुका संस्थापक अध्यक्ष,शिक्षक संघ स्याङ्जाका पूर्ब अध्यक्ष समेत रहनु भएको थियो । झण्डै १ दर्जन संघसंस्थामा कुशलता पूर्बक नेतृत्व प्रदान गरेकाले स्वर्गीय अर्याललाई स्याङ्जामा अग्रणी व्यक्तित्वका रुपमा लिने गरिन्छ ।
२००२ सालमा साविकको खिलुङकालिकाको बलमाटामा जन्मनु भएका अर्याललाई आदर्श र शिक्षाको धरोहरका रुपमा हेरिने गरिन्थ्यो ।
अर्यालको निधनले स्याङ्जाको शिक्षा क्षेत्रमा अपुरणीय क्षेती पुगेको पाईनिअज हायर एजेकेशन एकेडेमीका प्रिन्सीपल मेघराज गैह्रेले बताउनु भयो । पाईनिअजलाई अहिलेको अवस्थामा ल्याउन अर्यालको अमुल्य योगदान रहेको भन्दै प्रिन्सीपल गैह्रेले आफूहरुले एक अशल अभिभावक गुमाएको बताउनु भयो ।

Facebook Comments Box