दिल्ली विधान सभा : आमआदमी ६२ र बीजेपी ८ सिटमा विजयी, कांग्रेस शून्य

भारतको राजधानी दिल्लीका लागि भएको विधान सभामा आमआदमी पार्टी ६२ सिटमा विजयी भएको छ । त्यसेगरी भारतको सत्तारुढ दल भारतीय जनता पार्टी (बीजेपी) ले आठ सिटमा चित्त बुझाएको छ भने प्रमुख विपक्षी दल भारतीय राष्ट्रिय कांग्रेस शून्यमा छ ।

७० सिटका लागि शनिबार भएको निर्वाचनमा फेरि पनि पूर्वमुख्यमन्त्री अरबिन्द केजरिवालको आमआदमी पार्टीले बाजी मारेको हो ।

केजरिवालले मोदी नेतृत्वका पछिल्ला कदमहरु नागरिकता संशोधन कानुन र राष्ट्रिय पञ्‍जिकरणको खुलेर विरोध गरेका थिए । तर, बीजेपी भने केजरिवाललाई आतंकवादीको संज्ञा दिएको थियो ।

बीजेपीले जति प्रोपागान्डा फैलाए पनि केजरिवाल नेतृत्वको आमआदमी पार्टीले सन् २०१५ को नतिजालाई करिब दोहोर्‍याएका छन् । सन् २०१५ मा आमआदमी पार्टीले ६७ र बीजेपीले ३ सिटमा जिता हात पारेको थियो ।

दिल्लीका पूर्व मुख्यमन्त्री अरबिन्द केजरिवाल फेरि मुख्यमन्त्री बन्‍ने पक्का भएका छन् । उनले मंगलबार जित हात पारेसँगै हनुमान मन्दिर पुगेर दर्शन गरेका थिए ।

केजरिवाललाई भारतीय प्रधानमन्त्री नरेन्द्र मोदी, कंग्रेस नेता राहुल गान्धीलगायतका नेताहरुले बधाई दिएका छन् ।

शनिबार भएको मतदानमा ६२ दशमलव ५९ प्रतिशत मत खसेको थियो । तर, सन् २०१५ को दिल्ली विधानसभामा भने ६७ दशमलव ५ प्रतिशत मत खसेको थियो ।

उता दिल्लीमा फेरि कांग्रेसको फेरि शून्य दोहोरिएपछि दिल्ली पार्टी प्रमुख सुबास चोप्राले राजीनामा दिएका छन् ।

Facebook Comments Box