देशभर बदली र वर्षाको सम्भावना, तापक्रम घट्दा जाडो बढि ।

देशका अधिकांश क्षेत्रमा बलदी तथा वर्षाका कारण चिसो बढेको छ । पश्चिमी न्यून चापीय प्रणालीको प्रभावले देशभर मौसम बदली तथा हल्का वर्षा भएको हो । शुक्रबार स्याङ्जा सहित देशका केही क्षेत्रमा हल्का वर्षा भयो ।

शनिबार पनि मौसम बदली तथा वर्षाको सम्भावना रहेको जल तथा मौसम पूर्वानुमान महाशाखाले जनाएको छ । हाल देशभर आंशिकदेखि सामान्य बदली भएको छ ।

शनिबार देशको मध्य तथा पूर्वी भूभाग तथा पश्चिमका पहाडी क्षेत्रमा आंशिकदेखि सामान्य बदली हुने जनाइएको छ । यस्तै पश्चिम तराईका क्षेत्रमा आंशिक बदली हुनेछ । उच्च पहाडी तथा हिमाली क्षेत्रमा हल्कादेखि मध्यम हिमपात तथा पहाडी क्षेत्रका केही ठाउँमा हल्का वर्षा हुन सक्ने मौसमविदले बताएका छन् ।

शनिबार राति मध्य तथा पूर्वका भूभाग तथा पश्चिम पहाडी क्षेत्रमा आंशिकदेखि सामान्य बदली हुने जनाइएको छ । पश्चिम तराईका भूभागमा राति भने मौसम सामान्यतया सफा रहने छ ।

बदली तथा वर्षाका कारण अधिकतम तापक्रम घटेका कारण चिसो बढेको हो । शुक्रबार काठमाडौँको अधिकतम तापक्रम ९.९ डिग्री सेल्सियस मापन भएको थियो । शनिबार बिहान ६ डिग्री सेल्सियस मापन भएको छ।

Facebook Comments Box