अपडेट : गल्याङमा भएको दुर्घटनामा ज्यान गुमाउनेको संख्या ३ पुग्यो, घाईतेहरुको पाल्पामा उपचार हुँदै ।

आँधीखोला /गल्याङ :
स्याङ्जाको गल्याङ ३ मा जिप दुर्घटना हुँदा १ बालक सहित ३ जनाकोे ज्यान गएको छ भने २० जना घाईते भएकाछन् । पाल्पाको रम्भा गाँउपालिकाबाट गल्याङ्का लागि छुटेको लु १ ज ३८४१ नम्वरको जिप गल्याङ बजार नजिकै विपिसीको उकालो सडकबाट झण्डै ४०० मिटर तल खसेको प्रहरी चौकी गल्याङले जनाएको छ ।
दुर्घट्नामा रम्भा हुगीकी ६० बर्षिय थलीमाया सार्की, सोही ठाँउकै ३४ बर्षिय मन्जु भण्डारी गैह्रे र वालिङ १३ का ९ महिने बालक प्रशन्न परियारको मृत्यु भएको हो । गैह्रे र नेपालीको उपचारका क्रममा मृत्यु भएको हो भने बालकको घट्ना स्थलमै मृत्यु भएको प्रहरीले जनाएको छ ।
घाईते मध्ये १८ जनाको पाल्पामा उपचार भईरहेको छ । दुई जनाको गल्याङमा नै उपचार भईरहेको प्रहरीले जनाएको छ ।
दुर्घटनामा तीज मनाएर फर्किएका महिलाहरु परेको बताईएको छ । अत्यन्तै ओभरलोडका कारण दुर्घटना भएको प्रहरीको अनुमान रहेको छ ।