महिला नेतृत्व विकास, उद्दघोषण कला तथा कौसी खेति सम्बन्धी तालिम ।

आँधीखोला खवर/वालिङ :
वालिङ नगरपालिका वडा नं. १० ले महिलाहरुका लागि महिला नेतृत्व विकास, उद्दघोषण कला तथा कौसी खेति सम्बन्धी तालिम दिन शुरु गरेको छ । वडाले न्युरोड टोल विकास संस्थाका महिलाहरुका लागि नेतृत्व विकास उद्दघोषण र कौसीमा कसरी तरकारी फलाउने भन्ने विषयमा तालिमको आईतबार शुभारम्भ गरेको हो । तालिमको शुभारम्भ गर्दै वडा अध्यक्ष अनन्तराज गैह्रेले महिलाहरुलाई अगाडि बढाउन र महिला शसक्तिकरणका लागि नेतृत्व विकास र उद्दघोषण तालिमले सहयोग गर्ने बताउनुभयो । साथै वडा अध्यक्ष गैह्रेले बढ्दो बजारीकरण संगै आफ्नै घरको कौसिमा समेत व्यवस्थित रुपमा तरकारी फलाएर आफ्नो प्रयोजन र विक्रि वितरण समेत गर्न सकिने बताउनुभयो । वडा नं. १० लाई नमुना वडाको रुपमा विकास गरी वडाबासीलाई उत्पादनमुलक कार्यमा लगाउने र स्थानीयको कृषि उपज बजारीकरणका लागी वडाले सहयोग गर्ने आश्वासन दिनुभयो ।

कार्यक्रममा नगरपालिकाका सामाजिक विकास अधिकृत पदमप्रसाद पाण्डे, सहभागि मिना थापालगायतले तालिम निकै फलदायी हुने बताउनुभयो ।
न्युरोड टोल विकास संस्थाका अध्यक्ष पुर्णबहादुर गुरुङको अध्यक्षतामा सम्पन्न कार्यक्रममा स्वागत कोषाध्यक्ष प्रकाश थापा र सञ्चालन वडा सचिव दिपेन्द्र गैह्रेले गर्नुभएको थियो । टोलका ३० जना महिलाहरुको सहभागिता रहेको तालिममा नेतृत्व विकास र उद्दघोषण सम्बन्धी सञ्चारकर्मी कला राना र कौसि खेति सम्बन्धी कृषि प्राविधिक गिता खनालले सहजीकरण गर्नुहुनेछ । तालिम मंगलबारसम्म सञ्चालन हुनेछ ।