‘मेस्सीको बालोन डी‘ओर जित्ने सम्भावना न्यून’

messi-and-mourinho

इंग्लिस क्लब म्यानचेष्टर युनाइटेडका पूर्वप्रशिक्षक जोसे माउरिन्होले बार्सिलोनाका कप्तान तथा अर्जेन्टिनी खेलाडी लियोनल मेस्सीको सन् २०१९ को बालोन डी‘ओर जित्ने सम्भावना न्यून रहेको बताएका छन् ।

उनले हालसालैको एक अन्तरवार्तामा यस सिजनको प्रतिष्ठित अवार्ड बालोन डि’ओर जित्नेमा आशंका व्यक्त गरेका हुन् । माउरिन्होले पाँच पटकका बालोन डी‘ओर विजेतासमेत रहेका मेस्सीले बार्सिलोना च्याम्पियन्स लिगको सेमिफाइनलबाटै बाहिरिएको कारण सम्भावना न्यून रहेको बताएका हुन् ।

messi-and-mourinho
messi-and-mourinho

उनले च्याम्पियन्स लिग नै बालोन डी‘ओरको ठूलो आधार रहेको बताउँदै भने, ‘मेस्सीको सम्भावना न्यून छ । किनकी, उनी च्याम्पियन्स लिगमा असफल भए । च्याम्पियन्स लिग नै बालोन डी‘ओरको ठूलो आधार हो ।’

फुटबल जगतकै सर्वाधिक प्रतिष्ठित मानिने अवार्ड ब्यालोन डी‘ओर मेस्सी र उनका खास प्रतिस्पर्धी क्रिष्टियानो रोनाल्डोले समान ५–५ पटक हात पारेका छन् । यसपाली पनि यी दुवै स्टारलाई यस अवार्डको दाबेदार मानिएको छ । खास गरी रोनाल्डोको टोली युभेन्टस च्याम्पियन्स लिगको क्वार्टरफाइनलबाटै बाहिरिएपछि मेस्सीलाई प्रमुख दाबेदारको रूपमा हेरिएको छ ।

तर, माउरिन्हो भने यो मान्न तयार छैनन् । उनले लिभरपुलसँग हार्दै बार्सिलोना च्याम्पियन्स लिगबाट बाहिरिएपछि मेस्सीको सम्भावना न्यून भएको दाबी गर्छन् ।

मेस्सी यो सिजन युरोपका टप–५ लिगका सर्वाधिक गोलकर्ता खेलाडी हुन् । उनले यस सिजन सबैखाले प्रतियोगिता गरेर ४८ गोल गरेका छन् । उनले बार्सिलोनालाई ला लिगाको उपाधि जिताउन महत्त्वपूर्ण भूमिका निभाएका छन् भने बार्सिलोनालाई कोपा डेल रे फुटबलको फाइनलमा पुर्याएका छन् ।

Facebook Comments Box
TOP