आईसीसी टी-२० वरीयता : अलराउण्डरतर्फ पारस खड्का राेहित शर्मा र आन्द्रे रसेलभन्दा माथि

काठमाण्डाै – आईसीसीले सार्वजनिक गरेको नयाँ टी-२० वरीयतामा नेपाली राष्ट्रिय क्रिकेट टिमका तीन खेलाडी परेका छन् । नयाँ वरीयतामा कप्तान पारस खड्का, सोमपाल कामी र बसन्त रेग्मीले स्थान बनाएका छन् ।

वरीयताको अलराउण्डरतर्फ कप्तान पारस ३८ औंँ स्थानमा रहेका छन् । कप्तान पारस वरीयतामा यथावत रहेका हुन् । ७६ अंक पाएका कप्तान पारसको यो करियरकै ठूलो वरीयता हो ।

कप्तान पारस अलराउण्डरमा भारतका रोहित शर्माभन्दा अघि रहेका छन् । रोहित ४० औंँ स्थानमा रहेका छन् । त्यस्तै वेस्ट इन्डिजका आन्द्रे रसेल ४३औँ स्थानमा रहेका छन् ।

अलराउण्डरतर्फ ६० अंक पाएका सोमपाल एक स्थान सुधार गर्दै ४९ औंँ स्थानमा उक्लिएका छन् । यसअघि सोमपाल ५० औं स्थानमा रहेका थिए ।

यस्तै कप्तान पारस ब्याटिङतर्फ तीन स्थान तल झरेका छन् । पारस ९५ औंँ स्थानमा रहेका छन् । अघिल्लो महिना पारस ९२ औंँ स्थानमा थिए ।

बलिङको वरीयतामा सोमपाल र बसन्तले सुधार गरेको छ । समान ४०९ अंक पाएका सोमपाल ६८ र बसन्त ६९ औंँ स्थानमा रहेका छन् । यसअघि सोमपाल ७० र बसन्त ७१ औं स्थानमा रहेका थिए ।

आईसीसी टिम वरीयतामा नेपाल १४ औं स्थानमा यथावत रहेको छ ।

Facebook Comments Box