अस्ट्रेलियामा भएको सडक दुर्घटनामा परी स्याङ्जाका दुई विद्यार्थीको मृत्यु ।

आँधीखोला खवर :
अस्ट्रेलियाको राजधानी क्यानबेरा नजिक भएको सडक दुर्घटनामा परी दुई स्याङ्जाका विद्यार्थीको ज्यान गएको छ । अस्ट्रेलियाको परिचित पर्यटकीय क्षेत्र स्नोई माउण्टेनमा हिउँ खेल्न जाने क्रममा उनीहरुले चलाएको कार मोनारो हाइवेमा दुर्घटनामा परेको थियो ।
क्यानबेरास्थित नेपाली दूतावासका अनुसार सिड्नीबाट उक्त स्थानमा जान हिँडेका १५ जना साथीहरुमध्ये ५ जना चढेको कार दुर्घटनामा परेको हो । अन्य १० जना क्यानबेरामै बसेका भए पनि खाना खाएर ५ जनाको समूह भने एउटै गाडीमा स्नोई माउण्टेनका लागि राति नै हिँडेको बताईएको छ । दुर्घटनामा परी वालिङ नगरपालिका वडा नम्वर १० स्थायी ठेगाना भएकी समिक्षा सुवेदी र गल्याङ नगरपालिका वडा नम्वर ६ पेलाकोट स्थायी घर भएका गोपाल भण्डारीको ज्यान गएको हो ।
उक्त घटनामा घाइते भएका अश्विन कँडेलका अनुसार क्यानबेराबाट करिब २ घण्टाको बाटोमा रहेको उक्त स्थानमा चाँडै पुग्ने उद्देश्यका साथ उनीहरु राति नै हिँडेका थिए । कँडेलले दुर्घटनाको समयमा आफू निदाएकोले तत्कालै केही थाहा नपाए पनि दुर्घटनापछि सहयोगका लागि आपतकालीन सेवालाई सम्पर्क गरेको बताए । ‘फोनको ब्याट्री पनि नभएकोले घाइते अन्य साथीहरुसँग मुख्य रोडमा चलिरहेको गाडी रोकेर सहयोग मागेर प्रहरीलाई जानकारी गराउन सफल भयौं,’ उनले भने। बिदाको समयमा साथीहरु मिलेर हिउँ खेल्न सिड्नीबाट स्नोई माउण्टेनका लागि उनीहरु ३ वटा गाडीमा हिँडेका थिए ।
दुर्घटनामा सख्त घाइते दुईजनालाई हेलिकप्टरमार्फत उपचारका लागि क्याबेरा लगिएकोे थियो। उनीहरुको अवस्था खतरामुक्त रहेको बताइएको छ भने अर्का सामान्य घाइतेलाई घटनास्थल नजिकको कुमा अस्पतालमा उपचार गराइएको छ । क्यानबेराबाट ९० किलोमिटर टाढा भएको दुर्घटनापछि क्यानबेरा अस्पताल ल्याइएका घाइतेहरुको अवस्था बुझ्न कार्यवाहक राजदूत सापकोटाका साथै एनआरएन एसिटीका प्रतिनिधिहरु समेत अस्पताल पुगेका थिए ।
मृतकद्वयका साथै अन्य तीनजना सिड्नीको विश्वविद्यालयमा अध्ययन गरिरहेको बुझिएको छ । प्रहरीले दुर्घटनाको बारेमा अनुसन्धान गरिरहेको स्थानीय सञ्चारमाध्यम एबिसीले जनाएको छ ।

Facebook Comments Box