वालिङ नगरपालिकामा आज शोक बिदा ।

वालिङ,कात्तिक २१ गते ।
स्याङजाको वालिङ नगरपालिका आज (बुधबार) बन्द हुने भएको छ । वडा सदस्यको मृत्युको शोकमा नगरपालिकाले विदा दिएको हो ।
वडा नम्बर ११ का सदस्य ५९ वर्षीय ताराप्रसाद पराजुलीको निधन भएको हो । पराजुलीलाई फोक्सोसम्बन्धी समस्या रहेको वडा अध्यक्ष डण्डपानी पंगेनीले जानकारी दिनुभयो ।
वडा सदस्यको शोकमा वालिङ नगरपालिकाभित्र रहेका नगर कार्यपालिका, वडा कार्यालय, स्वास्थ्य संस्था लगायत बन्द रहने वालिङ नगरपालिकाका प्रमुख प्रशासकीय अधिकृत गंगालाल सुवेदीले जानकारी दिनुभयो । उहाँका अनुसार बुधबार बिहान १० बजे नगरपालिका कार्यालय तथा वडा कार्यालयहरुमा शोक शभा हुने छ । विद्यालयहरु भने खुला रहने बताईएको छ ।
वडा सदस्य पराजुलीको निधनले नगरपालिकालाई क्षती पुगेको वालिङ नगरपालिकाका प्रमुख कृष्ण खांणले बताउनु भयो । नेपाली कांग्रेसका स्थानीय नेता समेत रहनु भएका पराजुलीको निधन प्रति कांग्रेस नगर सभापति नेत्रप्रसाद पाण्डेले दुःख व्यक्त गर्नु भएको छ ।
स्थानीय तहको चुनाव २०७९ मा वडा सदस्य निर्वाचित हुनु भएका पराजुली २०७४ को चुनावमा पनि वडा सदस्य निर्वाचित हुनु भएको थियो ।
स्वर्गीय पराजुलीको मङ्गलबार नै कालीगण्डकी तट राम्दीमा अन्तिम संस्कार गरिएको छ । पराजुलीका श्रीमती,चार छोरी र दुई छोरा रहनु भएको छ ।