ग्रामीण स्वावलम्बनका शेयर सदस्यलाई सहकारी शिक्षा

वालिङ :
स्याङ्जाको अर्जुनचौपारी गाउँपालिकामा रहेको एक सहकारीले आफ्ना शेयर सदस्यलाई वित्तीय साक्षरता र सहकारी शिक्षा प्रदान गरिरहेको छ । गाउँपालिकाकै अब्बल र ठुलो ग्रामीण स्वावलम्बन साना किसान कृषि सहकारीले अन्तर समुहलाई सहकारी शिक्षा प्रदान गरेको हो । पछिल्लो समय सहकारीहरु समस्यामा परेका बेला आफ्ना शेयर सदस्यहरुलाई आफ्नो सहकारीको अवस्था सगै वित्तिय साक्षरता र सहकारी शिक्षा कार्यक्रम अगाडी सारेको सहकारीका प्रवन्धक शालिकग्राम काफ्लेले जानकारी दिनुभयो ।
सहकारीको आर्थिक बर्ष २०८०/०८१ को नीति तथा कार्यक्रम अनुसार अन्तर समुहलाई पशु बिमा, समाजिक सामुदायीक कार्यक्रम र सहकारीका समस्याका बारेमा प्रशिक्षण दिइरहेको प्रवन्धक काफ्लेले बताउनु भयो । उहाँका अनुसार पहिलो आग्रीखर्क, दोस्रो रापाकोट र तेस्रो चरणको केवरेमा सम्पन्न भइसकेको छ । यो कार्यक्रम गाउँपालिकाका सबै वडाहरुमा सम्पन्न गर्ने काफ्लेले बताउनु भयो । आफ्ना शेयर सदस्यलाई आयआर्जनको बाटोमा लैजान र सहकारीलाई बलियो बनाउन यो कार्यक्रम सफल हुने विश्वास लिइएको काफ्लेको भनाई छ ।
झण्डै ३२ सय शेयर सदस्य रहेको सहकारीमा शेयर पुँजी १ करोड ८० लाख रहेको छ । सहकारीमा १३ करोड बचत तथा जगेडा कोषमा ५ करोड रहेको प्रवन्धक काफ्लेले बताउनु भयो । ३२ करोड रकम सहकारीले कृषि, उद्यमी, व्यवसायी, शिक्षा लगायतमा लगानी गरेको जनाएको छ ।
सहकारीले प्रदान गरेको सहकारी शिक्षामा शेयर सदस्यको सहभागिता अत्यन्तै उत्साहजनक रहेको सहकारीका अध्यक्ष बोधराज रेग्मीले जानकारी दिनुभयो । सहकारीप्रति शेयर सदस्यको विश्वास बढ्दो रहेकाले नै सहकारीमा खराब कर्जा नरहेको दावी अध्यक्ष रेग्मीको छ ।
यो सहकारीले अर्जुनचौपारी गाउँपालिकाका शेयर सदस्य तथा गैह्र शेयर सदस्यलाई आवश्यकता अनुसारको कृषि उपज, कृषि सामाग्री र पशुपंक्षीका लागि सामाग्रीहरु अनुदानमा वितरण गर्दै आएको बताइएको छ । पशु विमा मार्फत आफ्ना शेयर सदस्यको पशुहरुको सुरक्षण कार्यक्रम समेत प्रभावकारी र आकर्षण रहेको सहकारीले जनाएको छ । सहकारीले दिने सेवा सुविधाकै कारण सहकारी प्रति शेयर सदस्यको विश्वास जितेको अध्यक्ष रेग्मीले बताउनु भयो ।

Facebook Comments Box