ओलीलाई कांग्रेस सांसद थापाको प्रश्न : नीति तथा कार्यक्रम कसरी कागजको खोस्टो ?

काठमाडौँ :

कांग्रेस सांसद राजु थापाले नेकपा एमालेका अध्यक्ष केपी शर्मा ओलीलाई ‘नीति तथा कार्यक्रम कसरी कागजको खोस्टो भयो ?’ भनेर प्रश्न गर्नु भएकाे छ ।

प्रतिनिधिसभाको सोमबारको बैठकमा आर्थिक बर्ष २०८०/८१ को नीति तथा कार्यक्रममाथि छलफलमा भाग लिँदै सांसद थापाले सरकारले ल्याएको नीति तथा कार्यक्रम कसरी कागजको खोष्टो भयो भनेर प्रश्न गर्नु भएकाे हाे।

प्रमुख प्रतिपक्षी दलका नेता समेत रहेका पूर्वप्रधामन्त्री ओलीले नीति तथा कार्यक्रम कागजको खोस्टोबराबर भएको भन्दै पुनर्लेखनको माग गरिरहेका बेला सत्ता पक्षका दलका सांसद थापाले भन्नु भयाे, ‘सरकारले नीति तथा कार्यक्रम घोषणा गरिरहँदा यो देशको नेतृत्व सम्हाल्नुभएका केपी ओलीले नीति तथा पुनर्लेखन हुनुपर्छ, केबल यो एउटा कागजको खोस्टा छ भनेर जनतालाई ढाँट्ने प्रयास मात्र हो ।’

सांसद थापाले विश्वभर आर्थिक संकट आएको सन्दर्भमा विगतमा कोभिड, भूकम्प, नाकाबन्दी र संविधान निर्माणका बेलामा जस्तो एकजुट हुनुपर्नेमा जोड दिनुभयाे । थापाले अहिलेको नीति तथा कार्यक्रम नेपालको परिवेशलाई सम्बोधन गर्दै कृषि, जलश्रोत र पर्यटन हाम्रा प्रमुख आधार भएकोले त्यही आधारलाई टेकेर ल्याइएको भन्दै कसरी कागजको खोस्टो मात्र हुन्छ ? भन्दै ओलीलाई प्रतिप्रश्न गर्नु भयाे ।

‘ओलीज्यूले पुनर्लेखन भनेको पनि सुनेँ केका लागि पुनर्लेखन ? के तपाईंले भनेजस्तो पानीजहाजको कुरा लेख्नुपर्ने हो ? के तपाईंले भनेजस्तो घर-घरमा ग्यासको पाइप भनेर लेख्नुपर्ने हो ? के तपाईंले भनेजस्तो एक घर एक रोजगारी लेख्दिन पर्ने हो ? के तपाईंले भनेजस्तो कुनै नेपाली भोकले मर्दैन भनेर लेख्दिनपर्ने हो ? तर, देशको मूल आधार भनेकै यही कृषि हो, यही जलश्रोत हो, यही पर्यटन हो, यही जनशक्ति हो , यसैको जडमा नीति तथा कार्यक्रम आएको छ,’ सांसद थापाले थप्नु भयाे ।

काँग्रेस स्याङजाका सभापति समेत रहनु भएका थापा स्याङ जा क्षेत्र नं. १ बाट निर्वाचित सांसद हुनुहुन्छ ।

Facebook Comments Box