स्याङ्जाको बिरुवामा निःशुल्क स्वास्थ्य शिविर सम्पन्न

स्याङ्जाको बिरुवा गाउँपालिका १ बिरुवामा सम्पन्न निःशुल्क स्वास्थ्य शिविरमा ८ सय १० जनाले सेवा लिएका छन् । किचनास बिरुवा कास्की सम्पर्क समाजले बिहीबार सञ्चालन गरेको निःशुल्क स्वास्थ्य शिविरमा स्थानीय महिला, पुरुष, बालबालिका र वृद्धवृद्धा गरी ८ सय १० जनाले मुटुको इको र पीसीजी ल्याब परीक्षण गराएको समाजका सदस्य बद्रीप्रसाद वाग्लेले जानकारी दिए ।

विशेषज्ञ चिकित्सकको सेवाबाट वञ्चित स्थानीयलाई निःशुल्क स्वास्थ्य सेवा प्रदान गरिएको वाग्लेले बताए । शिविरमा मुख, तथा दन्त, नाक, कान, आँखा, घाँटी, स्त्री तथा प्रसूतिसम्बन्धी सेवा उपलब्ध गराइएको थियो । यस्तै, जनरल स्वास्थ्य परीक्षण, छाला तथा यौन रोगसम्बन्धी, मुटु रोग, हड्डीसम्बन्धी जाँच तथा परामर्श गरिएको थियो ।

सुगर प्रेसरको पनि परीक्षण गरिएको आयोजक संस्थाले जनाएको छ । वरिष्ठ फिजिसियन पेट तथा कलेजो विशेषज्ञ प्रा. डा. युवराज शर्माको नेतृत्वमा १५ जना चिकित्सक सहभागी थिए ।

Facebook Comments Box