पुतलीबजारमा अनलाईन भवन निर्माण अनुमति प्रक्रिया पोर्टलको शुभारम्भ

पुतलीबजार :

पुतलीबजार नगरपालिकाको आयोजनामा घर नक्सा पासका लागि अनलाईन भवन निर्माण अनुमति प्रक्रिया पोर्टलको शुभारम्भ कार्यक्रम सम्पन्न भएको छ । पालिकाबासीहरुलाई सेवा बारे जानकारी दिन पालिकाको सभाहलमा अनलाईन भवन निर्माण अनुमति प्रक्रिया पोर्टलको शुभारम्भ कार्यक्रमको आयोेजना गरिएको हो ।

उक्त कार्यक्रमलाई सम्बोधन गर्दै पुतलीबजार नगरपालिका प्रमुख सिमाकुमारी क्षेत्रीले झन्झटको रुपमा रहेको घर नक्सा पासको लागि सेवा ग्राहीहरुले घरबाटै निवेदन दिन सक्ने बताईन् । शुभारम्भ कार्यक्रममा नगरप्रमुख क्षेत्रीले घर नक्सा पासकालागि फाईल बोकेर हिड्नुपर्ने बाध्यता र कागज पत्र हराउने डर कम भएको बताईन् ।

कार्यक्रममा प्रमुख प्रशासकीय अधिकृत रमेश घर्तीले पुतलीबजार नगरपालिकाले नयाँ नयाँ कार्यक्रमहरु ल्याउन लागेको बताउदै अनलाईन भवन निर्माण अनुमति प्रक्रिया पोर्टललाई सफल बनाउन सबैले सहयोग गर्नुपर्ने बताए । सोही कार्यक्रममा नेकपा एमाले पुतलीबजार नगरकमिटी अध्यक्ष भरत गोदार, नेपाली कांग्रेस पुतलीबजार नगरका सभापति सुरज कुमार अधिकारी र माओवादी केन्द्र पुतलीबजारका उपाध्यक्ष हिमलाल गौतमले पालिकाले रचनात्मक कार्य गर्दै अगाडी बढेको बताउदै पुतलीबजार नगरपालिकालाई सबै मिलेर राम्रो बनाउनुपर्नेमा जोड दिए ।

नगरप्रमुख सिमाकुमारी क्षेत्रीको अध्यक्षतामा सम्पन्न कार्यक्रमको संचालन घरनक्सा शाखा प्रमुख अरुण पौडेलले गरेका थिए । पुतलीबजार नगरपालिकामा मासिक रुपमा १० देखी १५ वटा घरहरु पास हुदै आएका छन् । कार्यक्रममा भुकम्प प्रविधि राष्ट्रिय समाजका इन्जीनियर कपील भट्टराईले सहजीकरण गरेका थिए भने घर नक्सा पासका लागि अनलाईन निवेदन पेश गर्ने पुतलीबजार नगरपालिका ३ का ओम प्रकाश गोदरलाई घर निर्माणका लागि अनुमती प्रदान गरिएको थियो । समयको माग अनुसार अनलाईन भवन निर्माण अनुमति प्रक्रिया पोर्टलको शुभारम्भ गरिएको पालिकाले जनाएको छ ।

Facebook Comments Box