‘२६ गते पार्टीका कुनै कार्यक्रम छैन भ्रममा नपर्नुहोला’-नेकपा गल्याङ अध्यक्ष अधिकारी

केपी खनाल/गल्याङ : नेपाल कम्युनिष्ट पार्टी नेकपा गल्याङ नगर कमिटिका अध्यक्ष नारायण अधिकारीले पुस २६ गते गल्याङमा पार्टीको कुनै कार्यक्रम नभएको बताउनु भएको छ ।
उहाँले नेपाल कम्युनिष्ट पार्टीको तर्फबाट नगरपालिका भित्र कुनै कार्यक्रम नगरिएको स्पष्ट पार्नुभयो ।
पत्रकारहरुसँगको कुराकानीमा अधिकारीले सामाजिक सञ्जालमा प्रचार गरी केही व्यक्तिले गुटको भेला गर्न खोजेको हुन सक्ने बताउनुभयो ।
उहाँले भन्नुभयो –‘पार्टी कमिटिले कुनै प्रकारको कार्यक्रम गरेको छैन । त्यसैले पार्टीमा आबद्व कोही पनि कमरेडहरु भ्रममा नपर्न म आग्रह गर्दछु ।’
आफु पार्टीलाई एकताबद्व बनाएर लैजाने पक्षमा रहेको भन्दै अध्यक्ष अधिकारीले स्याङ्जाको गल्याङ बजारमा गर्ने भनिएको कार्यकर्ता भेला तथा प्रशिक्षण पार्टीको नभई गुटको भएको स्पष्ट पार्नुभयो ।
उहाँले पार्टीलाई विधि पद्वतिमा लैजाने र एकताबद्व गरी पार्टीको रक्षा गर्नुपर्ने बेलामा केही व्यक्ति फुटाउने अभियानमा रहेको आरोप लगाउनुभयो ।
पार्टीलाई विभाजनमा पु¥याउन देशी विदेशी शक्ति क्रियाशिल रहेको भन्दै उहाँले यसबाट नझुक्किन र पार्टीको आधिकारिक बैठक, भेला तथा प्रशिक्षणमा मात्रै सहभागी हुन आग्रह गर्नुभयो ।
पार्टी सदस्यले पार्टीको विधि विधान र नियमहरुको पालना गर्नुपर्नेमा जोड दिदै उहाँले अनधिकृत रुपमा कसैले भेला गरेमा त्यो पार्टीलाई मान्य नहुने बताउनुभयो ।
व्यक्ति विशेष र गुटको भेलामा सहभागी नहुन र पार्टीको आधिकारिक कार्यक्रममा सबैलाई समेटेर लैजाने पक्षमा लाग्न उहाँले आग्रह गर्नुभयो ।

Facebook Comments Box
TOP