मोबाईल स्वास्थ्य कार्यक्रम वालिङ नगरस्तरीय प्रशिक्षक प्रशिक्षण शुरु

तोलाकान्त बगाले/वालिङ :

वालिङ नगरपालिकाको हलमा आजबाट मातृ तथा बाल स्वास्थ्य सेवा समन्वयका लागि मोबाईल स्वास्थ्य कार्यक्रमको नगरस्तरीय प्रशिक्षक प्रशिक्षण तालिम शुरु भएको छ ।

वालिङ नगर कार्यपालिकाको आयोजना तथा मेडिक मोबाईलको प्राविधिक सहयोगमा सञ्चालित तालिममा वालिङ नगर उपप्रमुख कल्पना तिवारीले आधुनिक प्रविधिको प्रयोगसँगै आमा र बच्चाको स्वास्थ्यमा ब्यहारिक प्रयोग गर्नु जरुरी रहेको बताउनुभयो ।

उहाँले बालमृत्युदरको संख्यालाई न्यूनिकरण गर्नका लागि मोबाईल स्वास्थ्य कार्यक्रम अर्थपूर्ण र उपयोगी हुने विश्वास ब्यक्त गर्नुभयो ।

कार्यक्रममा वालिङ नगरपालिकाका प्रमुख प्रशासकीय अधिकृत गुरुदत्त सुबेदी, जिल्ला स्वास्थ्य कार्यालय स्याङ्जाका प्रमुख यामप्रसाद शर्मा, मेडिक मोबाईल परियोजना प्रवन्धक दुसला अधिकारी लगायतले मोबाईल प्रविधिको प्रयोगले दीर्घकालीन र यथार्थपरक तथ्यांकहरु प्राप्त हुने भएकाले कार्यान्वयन प्रक्रियामा सहजता हुने बताउनुभयो ।

पहिलो दिनको कार्यक्रममा नगरभित्रका स्वास्थ्य संस्थाका प्रमुख तथा स्वास्थ्यकर्मीहरुको सहभागिता रहेको थियो ।

नगर उपप्रमुख कल्पना तिवारीको सभापतित्वमा सम्पन्न कार्यक्रमको सञ्चालन स्वास्थ्य शाखा प्रमुख कमलप्रसाद पाण्डेले गर्नुभएको थियो ।

Facebook Comments Box