शिक्षाबाटै चेतनाको विकास हुन्छ : वडा अध्यक्ष सुबेदी

वालिङ : वालिङ वडा नं. ८ का वडा अध्यक्ष कमलप्रसाद सुबेदीले शिक्षाबाटै चेतनाको विकास हुने बताउनुभएको छ । वालिङ ८ चिथाभञ्ज्याङस्थित भगवती आधारभूत विद्यालयको ३८ औं वार्षिकोत्सवको उद्घाटन गर्नुहुँदै वडा अध्यक्ष सुबेदीले जबसम्म शिक्षाको विकास हुँदैन तबसम्म चेतनाको विकास नहुने भएकाले चेतनाको विकासका लागि शिक्षाको महत्व रहेको बताउनुभयो । विद्यालयले यस क्षेत्रको शैक्षिक विकासमा महत्वपूर्ण योगदान दिएको स्मरण गर्दै शैक्षिक तथा भौतिक पूर्वाधार विकास लागि वडा कार्यालय प्रतिबद्ध रहेको वडा अध्यक्ष सुबेदीको भनाई थियो ।

कार्यक्रममा कार्यपालिका सदस्यद्वय युगमाया पंगेनी, गीता रनपाल, नेपाल आदर्श क्याम्पसका निर्देशक दीपक लम्साल, समाजसेवी तिलकराम उपाध्याय लगायतले मन्तब्य ब्यक्त गर्नुभएको थियो । कार्यक्रममा विद्यालयका प्रधानाध्यापक नारायणप्रसाद भण्डारीले विद्यालयको शैक्षिक एवं भौतिक प्रगति प्रतिवेदन प्रस्तुत गर्नुभएको थियो । शिक्षक थमन गुरुङको स्वागतसँगै शुरु भएको कार्यक्रम विद्यालय ब्यवस्थापन समितिका अध्यक्ष गनबहादुर गुरुङको सभापतित्वमा सम्पन्न भएको थियो भने सञ्चालन शिक्षक डण्डपाणी पंगेनीले गर्नुभएको थियो ।  (रेडियो आँधीखोला)