लिपुलेक र कालापानी सहितको नक्सा हामीले प्रकाशित गरिसकेका छौ : मन्त्री अर्याल (भिडियो सहित) ।

राधाकृष्ण डुम्रे/स्याङ्जा :
भूमि व्यवस्था, सहकारी तथा गरीबी निवारणमन्त्री पद्माकुमारी अर्यालले लिपुलेक र कालापानी समेटिएको नेपालको आधिकारिक नक्सा यस अघि नै सार्बजनिक गरेको बताउनु भएको छ । मन्त्री अर्यालले भन्नुभयो,“हामीले हाम्रो भुभाग समेटेर आधिकारिक नक्सा माघ फागुन तिर प्रकाशित गरिसकेका छौं ।” मन्त्री अर्यालले थप्नुभयो, मेरै नेतृत्वमा रहेको मन्त्रालयको नापी बिभागले प्रमाणित नक्सा प्रकाशित गरेको हो ।
स्याङ्जाको वालिङमा भएको दुर्गा खिमा फाउण्डेसनको उद्दघाटन कार्यक्रममा बोल्दै मन्त्री अर्यालले नेपालको जमिन आफूहरु समाप्त भएर पनि बचाउने उद्घोष गर्नु भयो । उहाँले नेपालीको स्वाभिमानसँग यो बिषय जोडिएको बताउनु भयो ।
कालापानी र लिपुलेक नेपालमा पर्छ हामीसंग ऐतिहासिक प्रमाण छ भन्दै मन्त्री अर्यालले भन्नुभयो,“सुगौली सन्धीमा नै स्पष्ट उल्लेख गरिएको कालीनदी सम्मको भुभाग नेपालको हो, तर भारत किन जिस्क्याई रहन्छन थाहा छैन ।” यसमा कुनै छलफल नै हुदैन उहाँको भनाई छ । लिम्पियाधुराको भुभागमा केही बिबाद भए पनि अरु भुभाग नेपालको रहेकोमा कुनै शंका नरहेको मन्त्री अर्यालको स्पष्टोक्ति छ ।
प्रधानमन्त्रीले शनिबारको लागि यो बिषयमा छलफल गर्न बैठक बोलाउनु भएको जानकारी दिदै मन्त्री अर्यालले अव सरकारले कदम चाल्ने धारणा राख्नुभयो । राष्ट्रमाथि आँच आउने कुरामा सरकार संवेदनशील रहेकाले त्यसमा पछाडि नहट्ने उहाँको तर्क छ ।