अष्ट्रेलियन स्वयंसेवकलाई स्वागत तथा अन्तरक्रिया कार्यक्रम

तोलाकान्त बगाले/वालिङ

वालिङ नगरपालिकाको शिक्षा क्षेत्रमा कार्य गर्नका लागि आउनुभएका अष्ट्रेलियन स्वयंसेवकलाई आज वालिङमा स्वागत तथा अन्तरक्रिया कार्यक्रम गरिएको छ ।

अष्ट्रेलियन स्वयंसेवक कार्यक्रम अन्र्तगत वालिङ नगरपालिकाले माग गरे बमोजिम वालिङको शैक्षिक क्षेत्रमा सहयोग गर्ने उद्धेश्यले आउनुभएका फिलिप स्टेवार्डलाई स्वागत गरिएको हो ।

कार्यक्रममा बोल्नुहुँदै वालिङ नगर प्रमुख दिलिपप्रताप खाँणले स्वयंसेवककोरुपमा वालिङ आउनुभएका फिलिपले अन्य देशहरुमा शिक्षाका क्षेत्रमा बटुलेको अनुभवलाई वालिङ नगरपालिकाले ग्रहण गर्दै शैक्षिक विकास केन्द्रीत गर्ने बताउनुभयो ।

शुरुका तीन महिना शिक्षाको सुधारका लागि योजना बनाउने, योजना प्रस्तुत गर्ने, प्रस्तुत योजनामाथि छलफल तथा तयारी गरी नयाँ शैक्षिक सत्रबाट लागू गर्ने नगर प्रमुख खाँणले बताउनुभयो ।

फिलिपले अन्य देशमा बटुलेका अनुभवहरुलाई वालिङको शैक्षिक विकासमा लागू गर्दै अगाडि बढ्ने नगर उपप्रमुख कल्पना तिवारीले बताउनुभयो ।

शिक्षा क्षेत्रमा रहेका समस्याहरुको पहिचान गरी समस्या समाधानका लागि सबै क्षेत्रबाट सहकार्य गर्दै अगाडि बढ्ने शिक्षा शाखा प्रमुख बाबुराम सापकोटाले बताउनुभयो ।

फिलिपले वालिङ नगरपालिकामा एकवर्षको अवधिमा शिक्षा तथा क्रिकेटको विकासकालागि सहयोग गर्ने बताईएको छ ।

Facebook Comments Box