गण्डकी प्रदेश थप एक जना कोरोना संक्रमितको मृत्यु

गण्डकी प्रदेश थप एक जना कोरोना संक्रमितको मृत्यु भएको छ ।

कोरोना संक्रमण भएर गोरखा अस्पतालको आइसोलेसनमा राखिएका ४४ वर्षे पुरुषको शनिबार बिहान मृत्यु भएको जिल्ला अस्पताल गोरखाले जनाएको छ । उनलाई शुक्रबार राति मात्र काेराेना पुष्टि भएकाे थियाे । ती पुरुष पालुङटार नगरपालिका ७ का बासिन्दा हुन् ।

लामो समयदेखि सुगरका बिरामी ती पुरुषमा कडा खालको निमोनियाको समस्या समेत देखिएको गोरखा अस्पतालका निमित्त मेडिकल सुपरिटेन्डेन्ट डा नवीन थापाले बताउनु भयाे ।

असार १६ गते कतारबाट आएका गोरखा पालुङटार नगरपालिकाका ती पुरुषमा स्वास्थ्य समस्या देखिएपछि जिल्ला अस्पतालको आइसोलेनमा लगिएको थियो । पालुङटारस्थित जीवनज्योति माविको क्वारेन्टिनमा बसेका उनलाई लगातार खोकी लागेपछि कोरोना परीक्षण गरिएको थियो ।

गोरखामा पहिलो पटक संक्रमितको उपचारको क्रममा मृत्यु भएको हो ।

योसँगै गण्डकीका ३ जना कोरोना संक्रमितको मृत्यु भएको छ ।
स्याङ्जाका ५८ र ५५ वर्षे कोरोना संक्रमित पुरुषको यसअघि नै मृत्यु भइसकेको छ ।