बाबाको मुख हेर्ने दिन……

खगेन्द्र भण्डारी :

हो,

आज बुबाको मुख हेर्ने दिन,

बुबा,!मुख त म हेरुला बाकी त्यही तस्बिर त छ।

आज हजारौं लाखौका बुबाहरुलाइ पुजिन्छ रे

के मैले नपुजेको होर ?

मनका कन्दराहरुबाट निस्कने स्नेहको अभाबमा

रोदन मात्र होइन अश्रुधाराले कसरी बुझ्छ र ??

हो आज बुबाको मुख हेर्ने दिन

साच्चै

बुबाको मुख हेर्ने दिन कस्ले बनायो होला है ?

उ.. त्यो

परको क्षितिज नियाल्दै

सपनाका हजारौं थान तमकुसहरुको दरबारबाट

सोच्छु

बुबा हुनेहरुलाइ त उत्सब होला तर

बुबाबिना पनि ताते ताते गर्दै लडिरहेका म जस्तालाई?? फगत

खुशी हराएको दिन

मन …

रोएर बुबा खोज्छ

खोज्न त

घरबाट एक फन्को कतै लगाएर आएपछि को मेरो प्रश्न

बा..! आमा खोइ कहाँ जानुभो र?

तर खोजेको त बाबालाई पो रहेछ।

बाबा बिना पनि एउटा संसार खोज्नु पर्ने पो रहेछ।

आशिर्वाद ..

आशीर्वाद खोज्दै थालिमा लड्डु टीका अरु मिठाई

र बा ले नै दिएको पैसाले ल्याएको उपहार अब

आमाको आँसु सङ्गै र कुडिएको मनको भोडारभित्रै

ताल्चा लगाएर बन्द गर्ने दिन

साच्चै .. आज

आमाको पोते चुडिएको दिन

बा…… बा

मेरो टाउकोमा हात राखेर सुम्सुम्याउदै

र मेरा यी हातहरुलाई स्नेही साथ अनि कहिल्यै

नामेट नहुने पथहरु

तपाईंको बिस्तारामै बसेर

फेरि तपाई सङ्गै सहयात्रा गर्न मन छ।

बा….बा …

सबैकुरा सपना जस्तो लाग्छ

फेरि तपाईं सङ्गै हास्न मन छ

अनि तपाई सङ्गै बसेर

ससार जित्ने साहस बटुल्न मन छ

दुखमा सङ्गै रुन छ अनि सङ्गै हास्नु पनि मन छ

पीडा आँसु र हरेस भुल्नु छ

बुवा…

बरु भनेको मान्छु तर एकपटक

बा को मुख हेर्न मन छ र भन्न मन छ

बा उ…. त्यो परको तपाईले

देखाउनुभएको शिखर चडेर माथी

पुगेपछी चिच्याउन मन छ

भन्नू मन छ

बा ! तपाईको सपना पूरा गरे ।

सत्यता,सादगी,निष्ठा त्याग समर्पण सत नछाड्ने यी गुण छाडेको छैन।

…अनि …..अनि

बा आज बुबाको मुख हेर्ने दिन

मुख त म हेरुला बाकी त्यही तस्बिर छ।

तपाईलाई सम्झेर भक्कानो नसुकेको

आमाको मन हेर्न सकेको छैन ।

तपाईंको काधमा बसेर उ….परको डाडो भन्दा अग्लो बनेर हिड्न मन छ

भगवान!

बुबा….

आँसु रोकेको छु

तर रुन मन छ,

धेरै कुरा गर्न मन छ

अगालोमा रहेर हजुरको काखमा बस्न मन छ

एक्लो भाछु साच्चै एकपटक बुबाको मुख हेर्न मन छ

अपसोस…

आज बुबाको मुख हेर्ने दिन!!!