साढे दुई महिनापछि नेपालमा कोरोना संक्रमितको मृत्यु ।

काठमाण्डौ:
नेपालमा पछिल्लो साढे दुई महिनामा कोरोना संक्रमणबाट एक जनाको मृत्यु भएको छ।

स्वास्थ्य तथा जनसंख्या मन्त्रालयका सह प्रवक्ता समिर अधिकारीका अनुसार ७३ दिन पछि आइतबार साउन १ गते नेपालमा कोरोना संक्रमणबाट एक जनाको मृत्यु भएको हो।

‘गत वैशाख २१ गते एक जनाको मृत्यु भएको थियो,’ अधिकारीले भने, ‘त्यसभन्दा अघि चैत ८ गते एक जनाको मृत्यु भएको थियो।’अधिकारीले धेरै अन्तरालपछि कोरोना संक्रमितको मृत्यु भएको जानकारी दिए। अधिकारीका अनुसार फागुनको पहिलो र दोस्रो साता कोरोना संक्रमित बिरामीको मृत्यु हुने दर उच्च रहे पनि पछिल्लो समय घटेको थियो।

मन्त्रालयका अनुसार पछिल्लो २४ घन्टामा देशभर थप १३५ जनामा कोरोना भाइरस संक्रमण पुष्टि भएको छ। ३ हजार ४१ जनाको कोरोना परीक्षण गर्दा उक्त संख्यामा संक्रमित थपिएका हुन्।एक हजार ४७३ जनाको पिसिआर र एक हजार ५६८ जनाको एन्टिजेन परीक्षण गरिएको थियो। ५९ जना संक्रमित निको समेत भएका छन्। अहिले देशभर एक हजार १४३९ जना सक्रिय संक्रमित छन्।